Jơnau gĭt gŏ bơh Anih tờm Yal tơngit tơrluh ù mờ Yal lài ñsừc dờng dà lềng, gơwèt Viện Vật lý Địa cầu pà gŏ, mìng tàm 20 ngai bồ nhai 7, tàm ù tiah kơnhoàl Kon Plông, càr Kon Tum neh gơlik geh 70 dơ̆ tơrluh ù. Lài mờ hơ̆, Anih do neh dờp geh tus git nđờ rơhiang dơ̆ tơrluh ù, mprơm ù gơlik geh tàm ù tiah do.

Kis tàm tiah hờ đah jum hìu măi pờ tơlik ồs đèng dà Thượng Kon Tum, lŏ Trần Thị Thu mờ uă làng bol kis tàm thôn 3, xã Tân Lập, kơnhoàl Kon Rẫy ờ sŭk ngan pah tŭ geh jơnau yal bè rơngô ù: “Tiah ƀòn tàm do kis đah jum bơtơ̆t dơng dà. Làng bol gŏ tơrluh ù là ờ sŭk ngan. Di lah bè tàm tiah ne mờ gơtìp tơrluh ù mờ lơh gơrềng bơta lơi mờ yuh dà ha là gơtìp dà cò tus den làng bol kis tàm tiah do là gơbam jơh tơn. Bè ờs là yuh dà neh lơh gơbam bloh, ờ git là kis bè lơi do?”.

Tàm mùl màl, tàm git nđờ rơhiang dơ̆ gơtìp tơrluh ù, mprơm ù gơlik geh tàm tơngai tàm kơnhoàl Kon Plông, làng bol geh gŏ bơta rơngô là ờ uă ngan. Làng bol kung mìng git geh tơrluh ù, mprơm ù bơh jơnau yal anih lơh broă tờm bal mờ anih yal tơngit dê. Mò Bùi Thị Oanh, kis tàm thôn Vi Rin, xã Đăk Tăng, kơnhoàl Kon Plông đơs bè do: “Làng bol kis tàm do den kung bè ờs sơl. Ờ hềt gŏ geh cau gơtìp den tàng ờ ngòt. Ờ hềt gŏ bơta ngòt rơngơ̆t đơs ngan là bè hơ̆. Tàm do ờ hềt gŏ gơtìp bơta dờng ờ”.

Tềng đăp mờ broă gơlik geh sùm bơh dơ̆ tơrluh ù tàm ù tiah kơnhoàl Kon Plông, nàng làng bol ờ ngòt mơya kung bañ sền ờ sơ̆p, ală kấp, gơnoar atbồ càr Kon Tum neh tơnguh broă sền gròi, yal tơngit, bơto sồr bơta git wă sơndră nàng pơrài nùs nhơm làng bol. Mơya, jăt ồng Nguyễn Hữu Tháp, Phó Củ tịc UɃÑZ càr Kon Tum yal, bơta ờ pràn ngan tŭ do là ờ hềt geh ală bơta kơlôi sơnơng lơi nền nòn bè dơ̆ rơngô ù tàm tiah do mờ do là bơta rềs àr ờ gơtùi yal lài gờñ den tàng gơtìp ờ thàn ngan: “Pơn jăt tai đơng lam ală sở, gah lơh broă tàm càr, ală kơnhoàl, ƀòn dờng bal mờ Kơnhoàl Kon Plông pơgồp bal nền nòn mờ ală Anih lơh broă kơlôi sơnơng nàng sền, rơcang sơndră mờ tơrluh ù. Càr Kon Tum ờ hềt geh broă mờng chài uă bè atbồ mờ sơndră mờ rơngô ù. Dan mpồl đơng lam dà lơgar rơcang sơndră mờ rềs àr bơh ù tiah pal sền gròi ngan, dong kờl càr nàng yal lài, sơndră mờ bơta gơlik geh bơh tơrluh ù tàm càr dê”.

Jăt jơnau dờp bơh Anih tờm Yal lài bè tơrluh ù mờ Ñsừc dờng dà lềng gơwèt Viện Vật lý Địa cầu yal, tàm git nđờ rơhiang dơ̆ rơngô ù, mprơm ù tàm ù tiah kơnhoàl Kon Plông, càr Kon Tum bơh nam 2022 tus tŭ do, dơ̆ rơngô ù geh bơta pràn ngan là 4,7 độ richter gơlik geh tàm lồi nhai 8 nam 2022. Tơnơ̆ mờ dơ̆ rơngô tơrluh ù dềt do, Cơl dŭ lơh broă Mpồl đơng lam Dà lơgar bè sơndră mờ rềs àr bơh ù tiah neh ai geh ală broă lơh nàng rơcang sơndră mờ rơngô tơrluh ù dềt, bè: tus sền mùl màl; bơyai lơh bơto nàng git ai ală kwang bàng tàm ală xã, thị trấn kơnhoàl Kon Plông in; bơyai lơh dơ̆ bơsram tàp rơcang sơndră mờ dà tih dà cò, rơngô tơrluh ù dềt lơh gơbàn...

Mơya tus tŭ do kung ờ hềt geh dùl broă lơh khoa họk nền nòn lơi kơlôi sơnơng bè tài bơta lơi gơlik geh, bơta ngòt rơngơ̆t bơh dơ̆ rơngô tơrluh ù dềt tàm ù tiah kơnhoàl Kon Plông, càr Kon Tum nàng bơh tŭ hơ̆ geh ai ală broă lơh nàng rơcang sơndră di pal.