Tàm 6 nhai bồ nam do, Hìu sơnơm kơnhoàl Di Linh, càr Lâm Đồng neh dờp rlau 250 nă kơnòm dềt gơtìp rềs àr sồt să, tàm hơ̆ rlau nggùl là kơnòm dềt gơtìp rềs àr gùng lòt. Ƀák sĩ Lê Công Tuấn, Phó Kwang atbồ Hìu sơnơm kơnhoàl pà git, kơnờm bơta pơgồp bal bơh uă mpồl dê, bơta rềs àr sồt să, ngan là bŭ dà neh gơmù: “Tàm nam 2024, bơta rềs àr sồt să tàm kơnòm dềt tàm kơnhoàl Di Linh gơmù rlau mờ ală nam lài, rềs àr gùng lòt geh rlau 50%. Kơnờm bơta pơgồp bal niam mờ hìu bơsram, mblàng yal, sồr kơnòm dềt bañ đì rơndeh măi, làng bol lời tĕ tŭ jơ sền gròi tus oh kòn uă rlau den tàng ală bơta rềs àr tàm rài kis mờ rềs àr bŭ dà gơmù rlau pơndrờm mờ ală nam lài”.

Mờ bơta krơi is là ù tiah kơh bơnơm, geh uă dà dờng, dà croh, tơnau dà mờ bơtơt rbòng dà, nàng rơcang lài kơryan rềs àr bŭ dà, ală mpồl cau, mpồl bal tàm kơnhoàl Di Linh neh tồt git nđờ rhiang nơm ƀàng tơngkah lài tàm ală tơnau dà, bơtơt rbòng dà; tơdùh phan pơrđồng, nrăng chi, che, rơkì… tàm ală tơnau dà. Mblàng yal, lam sồr làng bol lơh pơng gàr kơryan ală tơnau dềt bơh hìu bơnhă dê. Jat mò Ninh Thị Một, atbồ Tổ zân phố 17, ƀòn drà dềt Di Linh, kơnhoàl Di Linh pà git, tơnơ̆ tŭ mblàng yal, lam sồr den làng bol ndrờm lơh jat is, lam lơh broă lơh rơcang lài kơryan bŭ dà tàm hìu bơnhă: “Tơnơ̆ tŭ mblàng yal den làng bol neh tă is priă nàng blơi phan lơh che pơrđồng tàm tơnau dà nàng geh ală broă lơh rơcang lài kơryan bŭ dà jat jơnau pơlam bơh Mpồl sồr lơh rơcang lài kơryan bŭ dà ƀòn drà dềt dê”.

Bi Lưu Thị Thủy Chung ơm tàm Tổ zân phố 17, ƀòn drà dềt Di Linh, kơnhoàl Di Linh pà git, hìu bơnhă bi geh tờ dùl tơnau dà jrô rlau 10 thơk tàm suơn hìu bơnhă dê nàng ƀồm chi tam in. Nàng gàr lơngăp lơngai, bi neh pơng gàr gùt dar, lơh mpồng khoă wơl nàng ờ ai cau lik mut, pleh broă nđàc sơnggit digơlan gơlik geh: “Tơnau dà do añ ngui nàng ƀồm chi tam in, den tàng ală mơi lơh broă đah mpồl cau ùr tus pơlam kơt phan pơrđồng mờ kong rơndeh nàng dilah geh cau lơi gơdùh den gơtùi poal tềng hơ̆, hơ̆ sồng geh cau dong kờl. Ai gùt dar tơnau den geh pơng gàr mờ lơh mpồng nàng ờ ai cau lik mut rơngòt gơtìp aniai. Tŭ lơi hìu bơnhă kờñ den hơ̆ sồng pờ nàng mut”.

Broă bơto re dà mờ bơto pơlam bơta chài gàr lơngap lơngai tàm dà ai kơnòm dềt in kung geh kơnhoàl Di Linh sền gròi lam lơh. Tàm kàl rlô bơkang pa do, neh geh git nđờ jơt ơdŭ bơto re dà lời ai kơnòm dềt in geh pờ tàm ală xã, ƀòn drà dềt. Jat mò Hà Thị Thùy Linh, Củ tịc Mpồl tam klac cau ùr kơnhoàl Di Linh, càr Lâm Đồng pà git, là mpồl geh jơng tàm mpồl sồr lơh, mpồl cau ùr ală kâp là mpồl tờm ngan tus bal mblàng yal, tơnguh jơnau git wă rơcang lài kơryan rềs àr sồt să, bŭ dà tàm kơnòm dềt: “Pơgồp bal mờ ală mpồl, gah broă lơh, mpồl bal tàm ƀòn lơgar tus bal ală broă lơh mblàng yal tàm kâp hơ đơm, pờ ală ơdŭ bơto re dà ai oh kòn cau tàm mpồl cau ùr tàm gùt kơnhoàl. Bơh hơ̆ nàng kờñ tơnguh jơnau git wă, bơta chài ai cau ùr mờ kơnòm dềt in, pơgồp bơnah dong rài kis lơngăp lơngai, niam bơnĕ. Lơh gơlik bơta niam nàng kơnòm dềt in geh tiah ơm kis dờng pràn wil tơl rlau”.

Ală ơdŭ bơto re dà geh pờ neh dong ală oh geh tai bơta chài gàr lơngăp lơngai tàm dà kung bè pơlam tàp pràn să jan mờ geh ală broă lơh nhơl ñŏ geh kuơ tàm kàl rlô bơkang. Oh Nguyễn Thiên Di, 13 sơnam ơm tàm xã Liên Đầm, kơnhoàl Di Linh đơs: “Oh bơsram re dà neh 2 poh, geh ală pơgru bơto re dà. Tàm kàl rlô bơkang, oh bơsram re dà nàng rơcang lài kơryan bŭ dà mờ tơnguh pràn kơldang să jan ai să tờm in”.

Oh Trịnh Bảo Châu, 12 sơnam kung ơm tàm xã Liên Đầm pà git: “Oh bơsram ală bơta chài re dà nàng dilah ờ bơtuah gơtìp gơ dùh tàm tơnau dà, dà dờng, dà croh halà ală tơnau re dà jrô mờ he jă jơng ờ tus den he ngui bơta chài hơ̆ nàng rê hờ gah”.

Mờ bơta lơh bal bơh gơnoar atbồ mờ ală mpồl cau, mpồl bal dê, bơta rềs àr sồt să tàm kơnòm dềt tàm kơnhoàl Di Linh neh geh ală bơta tam gơl niam, dong ală oh geh nhơl ñŏ, dờng pràn lơngăp lơngai.