Sa tềp tus, tềng hơđang ù gờl, tơl hìu bơnhă bơtòm tơrgùm bal kềng gah sơlào piang, ală cau tàm hìu bơnhă yờ ly ơlak gờm chờ bal wă rò dùl nam pa rbô bơta niam. Ai tàm ală tiah bồt tàm bồt dờng Trường Sa, kwang bàng, cau ling ơm bal tàm nùs nhơm hô hơng wă rò sơnam pa, đơs chờ gờm chờ nam pa Giáp Thìn 2024. Sa tềp tàm Trường Sa ờ geh ơlak, biềr, ờ geh nhŭ jràu, ờ geh phăo bơkào mơya sùm chờ hờp mờ ram mhŭ ngan tài bơh nùs nhơm cau ling bal, nùs nhơm ling klàng làng bol tam klăc bal đềt mềr. Dơ̆ ràng tơlik kơ̆p gơn ngan rlau jơh tàm mang tơngăc nam yau wă rò nam pa tàm tiah bồt ngài là broă lơh tìp mat lơh kwèng đơs crih tam ya đah kwang bàng, cau ling mờ làng bol dê. Tàm ù tiah hìu pơrjum ram mhŭ, tơl nă cau đơs mpoong jơnau đơs crih tam klăc bal, tơngŏ nùs nhơm jơh nùs sền gàr gơnoar tờm bồt bơlào dà lềng dờng màng bơh Dà lơgar dê.

Trung tá Đặng Văn Tài, Cíñ trị viên Phó bồt Song Tử Tây, pà gĭt: nam do là nam dơ̆ 2 bi wă rò sa tềp tàm bồt. Bulah pal ơm ngài mờ hìu bơnhă, mơya dơ̆ lơi wă rò sa tềp tàm bồt kung là bơta chờ hờp ngan mờ bơta sền gĭt ờ tŭ lơi hŭi ờ. Trung tá Đặng Văn Tài, đơs:“Sa tềp tàm bồt kung tơl bơta ram mhŭ bơh ù gơl dê pơyoa tus, geh plai quất, bơkào đào, ƀañ mbar klơm kơnơm lơm pòng. Do là nùs nhơm đah ală làng bol, cau kòn, hìu bơnhă tềng hơđang ù gờl gơwèt mờ cau ling tàm bồt dê. Do là bơta tam klăc bal kơ̆ ngan nàng pơndờm pơđiang tam pà bal mờ kwang bàng, cau ling tàm bồt in ià kơ̆ ngkơr phàu nàng sền gàr kơ̆ kơl jăp gơnoar tờm ù tiah, bồt bơlào dà lềng, ù tiah dờng màng bơh Dà lơgar dê”.

Gơwèt mờ cau ling kơnòm să dơ̆ sơnrờp wă rò sa tềp ngài hìu ngan là kir sơnrai ờ gơtùi hŭi ngan. Tàm phan at bal tus tàm bồt bơh tơl nă ling dê là rùp hin ƀòn lơgar, mè bèp, cau pròc mhàm bal. Hơ̆ ngan là bơta gơn kơnờm geh tai bơta pràn dong cau ling in kơ̆ nùs rlau tai mờ kơnòl broă tàm tiah bồt ngài. Cau ling Hà Quang Huy, ƀòn tờm tàm Khánh Hòa, đơs: dơ̆ sơnrờp wă rò sa tềp tàm bồt ngài ngan nùs nhơm ngoh rơngăc gơtùi đơs ngan. Mơya rơnàng kơnòm să pal geh pơlam tàp mờ Huy pơnyờ să ngan bè bơta hơ̆. Cau ling Hà Quang Huy, đơs: “Kung kah ngan sơl mơya tài kơnòl broă pal lơh sir. Añ kờñ pơyoa tus mờ mè bèp mờ gơ̆p bơyô mờ bi hền tàm hìu là mè bèp iang nùs tĕ tài tàm do geh kấp hơđang mờ gah đơng lam mờ bal mờ oh mi, cau ling bal dong kờl añ uă ngan bơta niam. Añ kơ̆p kờñ tàm hìu mè bèp iang nùs tơnơ̆ 2 nam lơh sir kơnòl broă, lơh jat niam ngan kơnòl broă mpồl ling klàng dê den añ rơ̆p rê wơl mờ mè bèp”.

Ai cau ling Nguyễn Hữu Em, ƀòn tờm tàm càr Khánh Hòa đơs, bulah ngài hìu, kah ngan cau pròc mhàm mơya do là dơ̆ sa tềp geh uă kir sơn rai tàm rài kis he dê. Cau ling Nguyễn Hữu Em, đơs: “Nùs nhơm tŭ do kung geh dùl ết muăt jrùm sơl mơya geh oh mi ơm bal kung ờ hoan muăt jrùm sơl tŭ wă rò sa tềp ngài hìu. Bal mờ oh mi klơm kơnâm lơm pòng, klơm kơnơm jòng, ơn bơkào. Lài do ơm tàm hìu den geh cau tàm hìu bơnhă rcang jơh lơm den he ờ gŏ lơh bơta lơi ờ mơya tàm do den he lơh bal mờ oh mi ai gơ in chờ hờp. Kòn gờm chờ mè bèp lơngăp lơngai, bơtàu tơnguh tai, dilah kah kòn den kung ờ geh bơta lơi sơl, tàm do wă rò sa tềp mờ oh mi kung chờ hờp ngan, mè bèp ờ duh pal kơlôi kòn in ờ. Gờm chờ mè bèp sa tềp chờ hờp, wă rò dùl nam pa bềng bơta chờ hờp”.

Bi Cao Văn Giáp, Phó Củ tịc xã bồt Song Tử Tây pà gĭt: ling klàng mờ làng bol tàm bồt sùm wă rò sa tềp gờñ, tŭ ală ơhò pơndiang kơn jơ̆ ngan nùs nhơm bơh hơđang ù gờl bal mờ nha klơm mbar, phe mbar, mờ bơkào đào, bơkào mai mờ jơh bal ală khàp quất niam ngan...

Ai tàm mang tơngăc nam yau wă rò nam pa, tàm bồt kung chờ hờp ngan, ling klàng làng bol tàm at tê bal chờ hờp, đơs ñiŏ hô hơng gờm bal dùl nam pa geh uă pràn kơl dang să jan mờ geh cồng nha. Bi Cao Văn Giáp, đơs: “Tàm do ală bi mpồl ling mờ làng bol kung là cau rềp mềr mờ añ mờ añ kung là cau rềp mềr bơh khi dê sơl. Nùs nhơm sa tềp kung bè tàm jơh gùt lơgar sơl, ờ suơ̆i dùl bơta lơi ờ, geh mbar klơm kơnâm lơm pòng, bơkào mai, đào. Tàm hìu den tŭ tơngăc nam yau wă rò sơnam pa là bơtòm tơrgùm bal, ai bol añ là lòt gờm chờ sa tềp ală mpồl ling, tàm at tê bal ñiŏ chờ hờp, đơs jơnau pơndờm pơnđiang nùs nhơm, geh uă tŭ ngoh rơngăc ñìm bal mờ gơ̆p sơl mờ đơs là kah mè ngan”.

Hìu bơnhă, mè bèp, pơ ùr, oh kòn, cau pròc mhàm sùm là tiah dong kờl kơ̆ kơl jăp ngan. Gơwèt mờ ală cau ling pa kung bè hơ̆ sơl mờ ală sỹ quan neh đềt mềr tam klăc bal rlau 10 nam mờ phan soh cau ling dê kung bè hơ̆ sơl. Thượng tá Nguyễn Văn Khương, Cíñ trị viên bồt Song Tử Tây pơn yờ să đơs: ƀòn lơgar sùm là tiah kơldìng kơ̆ kơl jăp pah dơ̆ cau ling tiah bồt ngài dê wèt rê:“Bơdìh mờ jơnau gờm chờ sa tềp, bơdìh mờ phan pà phan bơna den gam geh phan  pà geh kwơ ngan hơ̆ là sră pơyoa añ cih pơyoa ai pơ ùr mờ oh kòn in nàng sền sră pơyoa hơ̆ nàng sền gĭt nùs nhơm wă rò sa tềp bơh bơklau ơm tàm bồt ngài dê, cau bèp tŭ sa tềp ngài hìu, gĭt geh nùs nhơm bơh bèp dê”.

Bi Khương kung bè cau ling bal he dê ndrờm gĭt là, nùs nhơm tơl nă cau ling dê geh wèt rê mờ hìu bơnhă, geh bơta kah pơ ùr, kah kòn, kah ƀòn lơgar mơya jơh ală bơta là tài broă lơh sền gàr Dà lơgar. Tài bơh Dà lơgar tàm tơl plai nùs cau Việt Nam dê là hìu ơm ram mhŭ, là bèp, là mè, là să tờm he dê. Den tàng, sa tềp gơwèt mờ cau ling tiah bồt ngài là bơta chờ hờp, bơta pơn yờ să tŭ ià kơ̆ ngkơr phàu sền gàr lơngăp lơngai ai tiah dà lềng, kơl wàng trồ Dà lơgar dê, ai bơta wil tơl nam pa bơh ƀòn lơgar Việt Nam dê.