VOV4.K’ho- Bơh dùl jơnau hòi jà tă pơgồp priă blơi kơnrồ ròng geh Ƀí thư Đảng ủy xã Cư̆ Pui, kơnhoàl Krông Bông, càr Dăk Lăk cih tàm internet, tus tŭ do, tàm xã tiah ngài do neh geh dùl “mpồl kơnrồ sơntìl” dong kờl ală hìu geh tơl bơta niam nàng brồ guh. Kơnòl bơh cau lam bồ bal mờ nùs nhơm tam klăc bal bơh mpồl Đảng ủy xã, neh gơs bơta pràn mờ geh kwơ mùl màl.

Bol añ tìp bi Vàng Seo Vư, kis tàm ƀòn Ea Rớp, xã Cư̆ Pui, kơnhoàl Krông Bông, càr Dăk Lăk tŭ bi gam ờ ru mờ broă dong kờl mpồl cau lơh hìu. Tàm bơta bơsùn uă bơta găc, bràs, ào mpha gam đềr sơmang, mơya bi Vư kung gam chờ hờp ngan sơl, tài ngai geh hìu pa gam mờr tus.

                                          Kơnrồ me pa geh jào hìu nhă bi Sinh in ròng tai

Bi Vư yal: Nam 1996, hìu nhă bi bơh càr Hà Giang tus ntrờn ơm kis tàm tiah ngài Ea Rớt do. Ờ gơdờp mờ ù tiah, dà ia, pơ-ùr sùm gơtìp kòp, hìu nhă gal kòn tai den tàng sơlơ kal ke ngan. Hìu lơh mờ mpàn neh ờ kơl jăp tai uă nam, mơya ờ hềt geh priă nàng lơh kơl jăp wơl. Nam 2017, bi dờp geh dùl nơm kơnrồ me deh kòn geh khà rơlao 15 tơlăk đong bơh broă “Mpồl kơnrồ sơntìl” xã dê. Tơnơ̆ mờ dùl nam ròng, kơnrồ me neh deh kơnrồ kòn mờ bi neh jào wơl kơnrồ sơntìl ai mpồl lơh broă in nàng jào ală hìu ndai in ròng tai. Tus tŭ do, tơnơ̆ mờ 4 nam ròng, kơnrồ me neh deh tai 3 nơm. Rài kis hìu nhă bơh tŭ hơ̆ ngai sơlơ ring niam. Tŭ xã hòi jà tă geh 60 tơlăk đong nàng dong kờl bi lơh hìu, den hìu nhă bi kung tă tai 20 tơlăk đong nàng lơh hìu dờng mờ niam. Bi Vàng Seo Vư đơs: “Ưn ngài xã neh ai hìu nhă añ in kơnrồ nàng ròng. Bơh tŭ hơ̆, gơdeh 3 nơm kòn, tŭ do hìu nhă tăc 2 nơm nàng rơcang lơh hìu. Hìu nhă ưn ngài xã neh sền gròi”.

Kung ndrờm bè hơ̆ sơl, bi Vũ Văn Sinh gơwèt hìu rơƀah, kis tàm ƀòn Ea Rớt, kung pa geh dờp kơnrồ nàng ròng sơl. Bi Sinh pà git, bi geh lơh ngan ròng niam kơnrồ nàng deh kòn, mhar geh tơnguh lơh sa hìu nhă: “Dờp geh kơnrồ dong kờl, hìu nhă añ chờ hờp ngan. Añ geh lơh ngan nàng ròng kơnrồ deh kòn, nàng tơnguh bơtàu lơh sa hìu nhă, ring niam rài kis. Ưn ngài xã mờ ƀòn lơgar neh sền gròi tus hìu nhă”.

                                Dùl hìu làng bol tàm xã Ea Rớt ciă ñhơ̆t nàng rơcang ai kơnrồ in sa 

Jăt ồng Vàng Seo Măng, kwang atbồ ƀòn Ea Rớt pà git: ală nam do, kơnờm mờ gơnoar atbồ xã dong kờl, ală hìu rơƀah geh dờp kơnrồ sùm lơh ngan ròng niam mờ pơn jăt tai lơh uă rơlao tai broă dong kờl kơnrồ ròng mờ jơnau kơ̆p kờñ mhar klàs mờ rơƀah. “Mờr 80% khà làng bol neh geh tam gơl, tơl hìu geh deh dùl dơ̆ bloh. Kơnờm mờ hơ̆ den tàng rài kis làng bol tàm do neh tam gơl ngan. Hìu rơƀah gam uă, mơya uă cau, uă hìu ờ gam jơgloh tai”.

Ƀòn Ea Rớt, xã Cư̆ Pui, kơnhoàl Krông Bông geh git tus là ƀòn kal ke ngan càr Dăk Lăk dê. Mpồl kơnrồ dong kờl là dùl tàm ală broă bơceh lơh nàng dong kờl làng bol brồ guh. Củ tịc UɃÑZ xã, ồng Nguyễn Văn Tâm là cau lam lài, ồng cih jơnau hòi jà tàm internet nàng jòi cau dong kờl. Tơnơ̆ mờ ală kơnrồ sơnrờp ngan geh jào pà hìu rơƀah tàm xã in ròng, broă lơh do geh ală kwang bàng tàm Đảng ủy xã, UɃÑZ xã dờp bal uă. Tơnơ̆ mờ 5 nam, tus tŭ do neh geh 43 nơm kơnrồ deh kòn geh jào pà ală hìu rơƀah in ròng, dong kờl làng bol rơhời sơrlèt ờ kal ke brồ guh. Tŭ do, ồng Nguyễn Văn Tâm neh tam gơl guh at gơnoar broă Ƀí thư Đảng ủy xã, gam xã Cư̆ Pui neh geh dùl mpồl kơnrồ sơntìl nàng ròng. Ồng Tâm pà git: Bal mờ broă lơh jăt di pal tàm broă đơng lam, lam sồr tơnguh bơtàu lơh sa, tơn jơh jơgloh tơmù rơƀah, broă ală kwang bàng tàm Đảng ủy xã tus bal lam sồr dong kờl cau rơƀah neh lơh geh tai ală cồng nha loh làng ngan: “Tus tŭ do, mpồl kơnrồ neh tơnguh bơtàu tus 67 nơm. Geh hìu tus tŭ do neh tơnguh bơtàu 3 nơm. Geh cau bơh broă dong kờl do, ròng kơrnồ dờng mờ tăc geh priă nàng lơh hìu ơm. Làng bol chờ hờp ngan, mpồl kơrnồ dong kờl ròng tàm xã Ea Rớt tus tŭ do neh geh cồng nha dờng màng ngan”.

Ờ mìng tus bal cih jơnau tàm internet nàng hòi jà ală cau geh nùs nhơm niam tă priă dong kờl, bơh Ƀí thư Đảng ủy tus mờ ală kwang bàng xã tàm xã Cư̆ Pui gam lam sồr cau tàm hìu nhă tờm, jơi nòi bal, cau bơyô dong kờl bal nàng blơi tai kơnrồ sơntìl dong kờl cau rơƀah. Ală broă lơh geh kwơ bơh kwang bàng, cau geh đảng tàm xã neh dong kờl uă hìu rơƀah tàm xã tiah ngài Ea Rớt rơhời geh rài kis hờm ram.

Cau cih Tuấn Anh-Cau mblàng Ndong Brawl