Yal lài, dơ̆ sa tềp bơhiàn yau dà lơgar dê nam 2023 do, jơnau kờñ blơi phan rơ̆p gơguh bơh 10 tus 15%, den tàng bè hơ̆, ală mpồl lơh sa kă bro lơh gơlik mờ kă bro phan neh lơh pràn lơh gơlik, kă bro, ơn prăp phan bơna nàng rơcăng drơng jơnau kờñ li la bơh cau ngui sa dê, kwơmàng là ală bơta phan sa, dà hùc. Nàng kờñ gàr tơl phan lơh gơlik mờ kờñ ngui sa, gàr kơ̆ drà kă bro bơh tŭ do tus dơ̆ sa tềp bơhiàn yau dà lơgar dê, Ƀộ Kông thương pơn jăt tai pơgồp bal mờ ală ƀộ, ngàñ ală tiah jăt sền nền broă gơlik geh tàm drà kă bro, gàr tơl ală anih lơh gơlik ală bơta phan kờñ pal geh drơng jơnau kờñ ngui sa, ngan là tàm ală dơ̆ ngui sa uă tàm dơ̆ lơh chờ, sa tềp nàng ờ lời gơlik jơnau ờ tơl phan, tơnguh giă.