VOV4.K’ho - Sơn đờm bơh drim ngai òr (07/07), tàm ƀòn dờng Kon Tum mờ geh bơyai lơh tàm 2 ngai, Pơrjum dơ̆ 3, HĐÑZ càr Kon Tum khoă 12 mờ uă broă gơlik geh, neh geh cau tĕ khà tàm càr sền gròi, geh ală kwang bàng tơrgùm cri bơyai, lùp mờ hơ jơnau lùp mờ tơlik kơrnoăt ală broă gơwèt mờ gơnoar.

                            Ală kwang bàng tus bal pơrjum dơ̆ 3, HĐÑZ càr Kon Tum khoă 12

Jơnau yal bè broă lơh sa mpồl bơtiàn 6 nhai bồ nam bơh UɃÑZ càr Kon Tum tàm pơrjum pà1 gŏ, bŭ lah kờp jơh lhà phan geh lơh tàm càr gơguh 9,69%, uă rơlao mờ khà gơguh lơh sa tŭ do nam lài, mơya uă khà broă tàm kơrnoăt sồr ờ geh jăt mờ bơta kơ̆p kờñ... Bal mờ hơ̆, geh uă bơta gam ờ pràn, ờ hềt geh bơsong di tŭ là bơta kal ke ngan bơh broă tơnguh bơtàu dê bè: lơh sa suơn sre cồng nha geh ờ uă; kòp gơtờp gơlik tàm tờm kơnuh sơnơm Ngọc Linh lơh hoàc huơr uă ngan tus mờ ală hìu làng bol; cồng nha broă lơh niam sră nggal, tơnguh broă bơcri priă, kă bro, tơnguh uă bơta pràn tàm pơrlòng bơh càr gam ờ pràn... tàm jơnau đơs sơn đờm pơrjum, ồng Dương Văn Trang, Ƀí thư Tỉñ ủy, Củ tịc HĐÑZ càr Kon Tum sồr ală kwang bàng tơrgùm bơta ngăc ngar, sồr geh broă lơh nàng bañ lời ală broă gam ờ pràn gơtìp jŏ jòng.

Tàm pơrjum dơ̆ 3, HĐÑZ càr Kon Tum khoă 12, cau tĕ khà càr Kon Tum kơ̆p kờñ gơnoar atbồ, ală gah, mpồl lơh broă geh gơnoar geh jơnau hơ di pal gơwèt mờ uă broă gơlik geh, geh pơnrơ, ờ sŭk tàm dơ̆ lùp mờ hơ jơnau lùp bè: bơta gơtìp mprơm ù tàm kơnhoàl Kon Plông; bơta mùl màl ờ tơl ù lơh hìu ơm, ù lơh sa bơh làng bol tàm tiah gơtìp tơrlah ù; lơyài tàm broă kĭ rơndăp broă ai ù tiah, rơndăp broă ngui ù kấp kơnhoàl; broă bơsong khà priă bảo hiểm y tế gơtìp ờ geh tơm, tă priă, toh wơl; broă cau y ƀák sĩ dan tam gơl ha là sơbì lơh broă...

Cau mblàng Ndong Brawl