Mang ngai 29/8, Thàñ ủy, Mpồl duh broă làng bol, Anih duh broă làng bol, Anih duh broă Mặt trận dà lơgar Việt Nam ƀòn dờng Hồ Chí Minh bơyai lơh yờ sa Mpồl cau ala mat Anih lơh broă ala mat cribơyai mờ lơgar ndai tàm ƀòn dờng (hơ̆ là Kwang atbồ ală Anih lơh broă ala mat cribơyai mờ lơgar ndai) gờm chờ 79 nam Ngai sơntờm dà lơgar Kộng hòa xã hội củ nghiã Việt Nam tàm Hìu lơh broă Anih duh broă làng bol ƀòn dờng. Củ tịc Anih duh broă làng bol ƀòn dờng Hồ Chí Minh ồng Phan Văn Mãi đơs bơta ki ngàm mờ pơn yờ să gơ wèt mờ ală broă lơh cribơyai mờ lơgar ndai duh hồl, geh kuơ mờ bơyô ală lơgar neh pơgồp bal mờ ƀòn dờng nàng lam lơh tàm jơh gùt tơngai lài. Bơh bồ nam tus tŭ do, ƀòn dờng neh wă rlau 30 mpồl kwang bàng kâp dờng lơgar ndai, geh kwang atbồ lơgar bơh uă lơgar ndai dê mờ geh mờr 100 dơ̆ wă nac lơhbroă mờ lơgar ndai mờ ală tơngume li la, tơrgùm tàm lơh broă bal bơtàu tơnguh lơh sa kơ̆ kơljap. Bơta do neh ai tơnggŏ gơnoar broă mờ bơngă pin dờn bơh ƀòn dờng dê gơ wèt mờ bơyô ală lơgar.

Di tơnkah 79 nam Sơn tờm dà lơgar Kộng hoà Xã hội Củ nghĩa Việt Nam, drim òr, kwang đơng lam bồ Tỉñ ủy, Mpồl duh broă làng bol, Anih duh broă làng bol, Anih duh broă Mặt trận Dà lơgar Việt Nam càr Dăk Lăk bal mờ ală mpồl ling mờ làng bol neh tus pơdơng goàng bơkào, chu ñàng ies tàm ƀlàng tơ̆p ƀồc cau ling chơ̆t màng càr, do là anih tơ̆p 2 rơbô 326 nă cau ling chơ̆t màng. Tàm nùs nhơm kah kơlôi nền nòn, ală kwang bàng neh pơdơng goàng bơkào, chu ñàng mờ kun bồ ưn ngài, tơlik nùs nhơm git ưn ngài uă ngan gơwèt mờ broă lơh dờng màng bơh ală Cau ling khin cha jăk chài dê, neh khin cha tam lơh, phi să tài broă tam lơh tơnklàs jơi bơtiàn, tơrgùm bal dà lơgar. Tơnơ̆ mờ dơ̆ chu ñàng, pơdơng bơkào, kwang đơng lam bồ càr Dăk Lăk bal mờ ală mpồl ling mờ gal làng bol neh chu ñàng tàm ală bơtô ƀồc cau Ling chơ̆t màng.