VOV4.K’ho- Di dơ̆ tơngkah kir sơnrai 92 nam Ngai crơng gơs Mpồl tam klăc cau ùr Việt Nam, mang ngai 18/10, tàm Hà Nội, Mpồl tam klăc cau ùr Việt Nam bơyai lơh broă lơh đơs crih tam ya “Bơta niam bơnĕ ào kăp Việt Nam”. Tus bal geh Phó Củ tịc lơgar lài do mò Đặng Thị Ngọc Thịnh.

Dơ̆ ràng tơlik ală ào kăp tàm broă lơh dê

Tàm dơ̆ lơh broă do, ală cau chài, cau đơs crih tam ya tàm Hìu đơs crih, lơh lèo Việt Nam pơgồp bal bơyai lơh ràng tơlik ào kăp bơh cau chài mai ào kăp Đỗ Trịnh Hoài Nam mờ ală cau chài mai ào kăp cau ùr jat 3 tơngume: Rê wơl tiah tờm- Hà Nội lài do; Bơta niam bơnĕ mờ mŭt gơ rờm bal. Do là bơta tơrgùm bal bơh ală dơ̆ bơyai lơh đơs crih, lơh lèo niam ngan nàng jờng rơ rùp hin cau ùr Việt Nam dê mờ ală dơ̆ bơyai lơh ào kăp cèng uă bơta niam bơnĕ mờ bơta kờñ gơboh gơwèt mờ ào kăp. Broă lơh đơs crih tam ya do nàng kờñ lơh kah rơngal wơl bơta kờñ gơboh, bơta pơn yờ să mờ kơnòl prap gàr, lơh jat bơta kwơ phan lời wơl bơh yau ào kăp dê mờ yal tơngĭt rùp hin ào kăp, kòn bơnus Việt Nam dê tus mờ uă ngan làng bol mờ gơ̆p bơyô tàm dunia dê.

Ngai 18/10, mpồl tam klac cau ùr càr Kon Tum bơyai lơh ròt ală broă lơh geh kuơ ngan di tơngkah kir sơnrai 92 nam Ngai cau ùr Việt Nam. Pơn rơ ngan là Broă lơh Mè ròng- Tàm tơrbŏ bơta kờñ gơboh; cribơyai ring bal ùr klau; Ngai cau ùr sơn đờm mut lơh broă nam 2022 mờ Tơn jơh dơ̆ pơrlòng cau ùr sơn đờm mut lơh broă; Cribơyai tàm lùp broă lơh mờ lam lơh srơh tàm pơrlòng “Bơt bơtàu cau ùr Việt Nam tŭ tơngai pa”. Mìng is broă lơh Mè ròng- tàm tơrbŏ bơta kờñ gơboh, ală kâp mpồl neh hòi jà bơta tă pơgồp, at tê bal dong kờl kơnòm dềt kòn đời geh rài kis uă kal ke mờ priă hòi jà geh rlau 2 tơmàn đông.

Củ tịc Mpồl tam klac cau ùr càr Kon Tum pà phan ai mè ròng mờ kơnòm dềt kòn đời in

Di dơ̆ do, Mpồl tam klac cau ùr càr Kon Tum jàu khà jờng ai 10 tàm 23 jơnau bơceh pa sơn đờm kă bro mờ sơn đờm mut lơh broă tơngai bơh nam 2021 tus nam 2025; hơ pơrgon dong kờl 22 jơnau bơceh pa sơn đờm mut lơh broă bơh oh mi cau ùr dê bơh priă ai càn dong kờl priă cồng bơh Ngân hàng Cíñ sác xã hội dê mờ kờp jơh priă càn rlau 5 tơmàn đông.

VOV/VOV Tây Nguyên/K’Hạnh mờ K’Duẩn mblàng