Kwơmàng, Pơrjum geh bơta tus bal bơh 210 nă kwang bàng ala măt pơnrơ jak ai cau geh bồ tơngoh bơsram sră jak, ală cau jak, cau cih jơnau đơs crih tam ya geh uă cồng nha jak ngan tàm broă lơh, tă pơgồp bơ̆t bơtàu rài jak chài măy mok, bơto bơtê bơh dà lơgar dê mờ rài niam chài Việt Nam gơguh jak, bềng rài kis niam chài is jơi bơtiàn dê.

Đơs tàm dơ̆ pơrjum, Củ tịc lơgar Võ Văn Thưởng tơlik nùs nhơm tơngŏ bơta ki ngàm, ưn ngài jrô ơnàng tus mờ ală rơnàng cau geh bồ tơngoh bơsram sră jak, cau jak, cau cih jơnau đơs crih tam ya, là ală cau jak bơh dà lơgar dê neh tă pơgồp bồ tơngoh jak mờ bơta pràn, lơh broă ờ gĭt glar bòl bơh bơta kờñ gơboh kòn bơnus mờ dà lơgar, pin dờn uă ngan, là mpồl cau geh bồ tơngoh bơsram sră jak, cau jak, cau cih jơnau đơs crih tam ya Việt Nam bulah gam ơm kis mờ lơh broă tàm lơgar halà lơgar ndai, bơh bơta kờñ gơboh mờ kơnòl, bơta pràn jak mờ bơceh lơh ndrờm gơtùi tă pơgồp ai Dà lơgar in jăt broă lơh krơi is bơh he dê; bal mờ gơ̆p bơ̆t bơtàu, ngui niam bơta pràn tam klăc dờng jơh gùt jơi bơtiàn mờ ală bơta kwơ niam bơnĕ bơh niam chài, kòn bơnus Việt Nam dê, lơh gơlik bơta pràn dơlam is dờng ngan, ai dà lơgar he ngai sơlơ bơtàu tơnguh, pas sơm, chờ hờp chờ hờn.