Tơnơ̆ mờ mờr 1 nhai tus bal mờ ơdŭ bơto re dà ờ sa priă geh lơh tàm xã, geh uă kơnòm bơsram tàm 2 xã Cư̆ Mgar mờ Quảng Hiệp, kơnhoàl Cư̆ Mgar, càr Dăk Lăk neh git re dà mờ git tàm broă lơh tŭ gơtìp bŭ dà. Oh H’ Niêm Niê, kis tàm ƀòn Knă B, xã Cư̆ Mgar, kơnhoàl Cư̆ Mgar yal: “Kòn mờ ală bơyô ờ git re dà mờ bol kòn kờñ ngan bơsram re dà nàng rơcang sơndră mờ bŭ dà tŭ tiăt dà dờng, dà croh. Ơdŭ bơsram do dong kờl bol kòn git tàm broă re dà mờ sơndră mờ bŭ dà”.

Oh Phan Hoàng Quý Phước, kis tàm xã Quảng Hiệp, kơnhoàl Cư̆ Mgar yal: “Hìu kòn ngài ngan den tàng kờñ lòt tus tàm tiah ndai nàng bơsram re dà gơtìp kal ke ngan. Ală mlŏ, wa neh cèng tơnao tus tàm do, kơnờm mờ hơ̆ den tàng kòn neh git re dà mờ ờ gam ngòt dà bè lài do tai”.

Ală ơdŭ bơto re dà ờ sa priă tàm 2 xã Cư̆ Mgar mờ Quảng Hiệp mờ măt sơnđan “tơnao re dà ntrờn tus tàm ƀòn” là broă lơh geh mpồl Tài mpồl kơnòm dềt kờñ gơboh kơnhoàl Cư̆ Mgar pơgồp bal mờ ală mpồl lơh broă bal mờ cau geh nùs nhơm niam lơh tàm kàl rơlô bơkang nam do. Broă lơh do neh dờp broă dong kờl, lơh broă bal bơh uă cau pơgru mờ làng bol kis tàm xã do. Bi Hà Mạnh Tuấn, cau pơgru bơto tàm hìu bơsram kấp 2 Ngô Mây, xã Ea Mdroh yal: “Pơgồp bal mờ pơgru Chuyền bơto jơnau git wă tàm broă re dà ai ală kơnòm dềt tàm dơ̆ rơlô bơkang in nàng ală kơnòm dềt kis tàm do geh bơsram ờ sa priă”.

Mò Hồ Thị Nhâm, kis tàm xã Cư̆ Mgar, kơnhoàl Cư̆ Mgar, càr Dăk Lăk yal bè bơta chờ tŭ tus bal dong kờl ală kơnòm dềt in geh tiah bơsram re dà: “Añ dong kờl ƀlàng, dong kờl priă ồs đèng ai ală kơnòm dềt in nàng dong kờl ală kơnòm dềt geh tiah bơsram, gơlơh chờ hờp ngan tŭ geh dong kờl bơta lơi den he dong kờl”.

Bi Mai Văn Chuyền, cau pơgru bơto tàm Hìu bơsram kấp 2 Ngô Mây, atbồ mpồl Tài kơnờm dềt kờñ gơboh kơnhoàl Cư̆ Mgar pà git, nùs nhơm ờ sŭk ngan bè broă geh uă kơnòm dềt kis tàm tiah ngài gơtìp bŭ dà, tàm 3 nam do, mpồl neh lơh ngan hòi jà mpồl bơtiàn, ală cau geh nùs nhơm niam tus bal dong kờl priă nàng lơh tơnao dà ntrờn mờ pờ geh ală ơdŭ bơto re dà ờ sa priă tus tàm ală xã. Tus tŭ do, mpồl neh geh 3 nơm tơnao dà tàm 2 kơnhoàl Cư̆ Mgar mờ Krông Bông. Tàm kàl rơlô bơkang do, tơnao dà ntrờn neh geh ntrờn tus tàm ală xã nàng bơyai lơh ai ală kơnòm dềt in bơsram re dà. Tàm 3 nam do, neh geh mờr 600 nă kơnòm dềt geh bơsram re dà ờ sa priă di tàm kàl rơlô bơkang.

Bal mờ hơ̆, tŭ mŭt nam bơsram, mpồl geh pơgồp bal mờ ală hìu bơsram bơyai lơh ală dơ̆ bơto, pơlam kơnòm bơsram bè jơnau git wă nàng sơndră mờ bŭ dà. Kung jăt bi Mai Văn Chuyền đơs, tŭ do mpồl gam pơn jăt tai rề ơnàng cau mờ ù tiah nàng bơto pơlam, pơgồp bal mờ broă bơyai lơh ai ală cau pơgru, cau drơng broă đội tàm ală hìu bơsram in nàng ală cau do in git tai mờ rơcang rơlao tàm broă yal mblàng, bơto pơlam kơnòm bơsram. Mờ mpồl pơn jăt tai lam sồr tă priă nàng blơi pà ală broă lơh, phan drơng tàm broă bơto ală hìu bơsram in. “Kung kơ̆p kờñ dong kờl ală kơnòm dềt in git tai ală bơta bal mờ jơnau git wă nàng rơcang sơndră mờ bŭ dà geh cồng nha. Añ kung kơ̆p kờñ là tàm tơngai tus gơnoar atbồ ƀòn lơgar, ală mpồl lơh broă, ală cau mè, bèp kơnòm bơsram geh sền gròi uă rơlao tai tus mờ broă rơcang sơndră mờ rềs àr chơ̆t jê, rềs àr bŭ dà ai ală kơnòm dềt in, mờ kơ̆p kờñ geh uă rơlao tai broă tus bal bơh ală mpồl lơh sa kă bro, mpồl lơh broă, cau geh nùs nhơm niam, tàm hơ̆ uă ngan là ală gah, mpồl lơh broă tàm kơnhoàl nàng gơtùi bơyai lơh pờ geh ală ơdŭ bơto re dà ală kơnòm dềt tàm ală tiah ngài in”.

Càr Dăk Lăk ai geh jơnau kờñ tus nam 2025 jơh ală kơnòm dềt tàm sơnam bơsram kấp 1, kấp 2 geh git wă bè bơta gơtìp rềs àr, chơ̆t jê; 50% git ală bơta niam tàm tiah dà. Nàng lơh geh jơnau kờñ do, broă tus bal, pơgồp bal bơh ală cau, mpồl lơh broă bal mờ ală cau geh nùs nhơm niam tàm broă pờ geh ală ơdŭ bơto re dà là pal geh ngan. Tàm hơ̆ uă ngan là gơwèt mờ ală tiah ngài, tiah kal ke, ală ơdŭ bơto re dà ờ sa priă geh dong kờl ai uă kơnòm dềt in geh tus bal, bơsram nàng git bơta  niam rơcang sơndră mờ bŭ dà.