Sùm tàm ală nam do, bơnah brê bơh Kông ty Lâm nghiệp Krông Bông, kơnhoàl Krông Bông, tiah hờ đah jum măt tơngai lik càr Dăk Lăk, gơs tiah geh uă bơh broă mus kơl brê. Ală bă brê rềp bal mờ ală kơnhoàl Ea Kar, Mdră, càr Dăk Lăk mờ kơnhoàl Khánh Vĩnh, càr Khánh Hoà, tàm hơ̆ uă ngan là ală bă brê jăt gah gùng rơndeh ntoăt jờl Khánh Hoà - Buôn Ma Thuột gam lơh, brê gơtìp sơgràm uă ngan. Uă bă brê neh gơtìp mus kơl, chu aniai. Uă tờm chi gơtìp òt kơl mờ pa chu, tờm chi dờng tus 2, 3 nă cau koar.

Ồng Bùi Quốc Tuấn, Kwang atbồ Kông ty Lâm nghiệp Krông Bông pà git, rơlao 2 rơbô hìu, di pơgăp 17 rơbô nă cau ntrờn ơm kis bơh ală càr tiah đah tô dà lơgar mŭt tàm bă brê bơh kông ty dê, lơh gơtìp mus kơl chi brê ờ jai sền gròi. Bal mờ hơ̆, geh uă rơndăp broă lơh tờm bè bơtơ̆t rơbòng dà, gùng lòt geh lơh tàm do geh toh wơl ù lơh hìu ơm, ù lơh sa bơh làng bol dê, mơya ờ hềt lơh niam broă lơh ƀòn ơm kis pa, tiah tam phan pa, lơh gơtìp tus mờ broă làng bol ur ar mŭt tàm bă brê bơh kông ty nàng mus kơl brê, sơgràm ù brê. Ồng Bùi Quốc Tuấn pà git: “Sùm tàm ală nam pa do lơh jăt ală rơndăp broă lơh dờng, hơ̆ là tơnao dà Krông Păc thượng, gùng Đông Trường Sơn mờ uă ngan là gùng rơndeh ntoăt jờl Khánh Hoà - Buôn Ma Thuột. Tàm bă brê Ea Tlong là tiah kong gơtìp uă ngan bơta kal ke bơh gơl gùng rơndeh ntoăt jờl là geh tơngŏ làng bol rơsìh sơnơm gơsơ̆t tờm chi brê, kal ke ngan gơwèt mờ broă atbồ, sền gàr brê. Mờ bơta gơrềng ờ niam bè do lơh roh brê mhar ngan”.

Tàm tiah hờ đah tô măt tơngai mŭt càr Dăk Lăk, rơlao 5 rơbô 800 lồ tàm khà 8 rơbô 800 lồ brê geh Kông ty Lâm nghiệp Buôn Ja Wầm, kơnhoàl Cư̆ Mgar atbồ, sền gàr neh ờ gam geh brê tai. Tàm pơgăp 3 rơbô brê gam tai, geh sền là geh brê, mơya neh ờ geh uă brê tai. Tŭ do, brê tàm tiah do kung gam pơn jăt tai gơtìp mus kơl uă ngan. Bơnah brê gơtìp mus kơl uă, mìng ngài mờ anih atbồ, sền gàr brê 2, 3 rơhiang thơ̆k. Ồng Trần Hồng Minh, kwang bàng lơh broă tàm anih atbồ mờ sền gàr brê sồ 1, gơwèt Kông ty Lâm nghiệp Buôn Ja Wầm pà git, ală cau mus kơl chi brê  pa do khin mờ ờ ngòt cau lơi. Bŭ lah tàm bă brê rềp ha là ngài, di lah gam geh chi brê là gam mus kơl aniai.

Tŭ geh cau sền gàr brê gŏ, ală cau do tŭ lơi kung tam dră, geh tŭ gam lơh mpồl cau sền gàr brê. Să tờm ồng Minh neh geh tŭ gơtìp git nđờ jơ̆t nă cau mus kơl chi brê lơh pal mŭt piam kòp tàm hìu sơnơm. Ồng Trần Hồng Minh pà git: “Làng bol kis ntrờn gùt tiah tàm brê, ală cau do sơgràm ù brê den tàng he gơtìp kal ke ngan. Tŭ do kal ke ngan, să tờm añ lòt lơh broă den ală cau kung tus tơn tàm anih sền gàr do lơh mờ pal mŭt piam tàm hìu sơnơm, ală cau do khin mờ ngòt rơngơ̆t ngan”.

Ồng Nguyễn Công Văn, Phó Củ tịc UɃÑZ kơnhoàl Cư̆ Mgar, càr Dăk Lăk đơs tus bơta mùl màl kơlôi rơcang ngan tàm tiah do tŭ làng bol kis ntrờn khăt gơboh tus ur ar mus kơl chi brê, sơgràm ù brê. Tàm tŭ bơta kal ke tàm broă sền gàr brê sơlơ dờng den tŭ mpồl cau sền gàr brê dan ơm ờ lơh broă uă. Uă cau tờm brê tŭ do neh ờ tơl pràn nàng sền gàr brê tai. Brê tàm ù tiah kơnhoàl Cư̆ Mgar di gơlan gơtìp roh jơh ờ geh tai. Ồng Nguyễn Công Văn pà git: “Geh uă cau neh sơbì lơh broă, lơh tus mờ bơta ală kông ty lâm trường tàm kơnhoàl Cư̆ Mgar ờ geh bơta pràn tai nàng atbồ, sền gàr brê. Tàm kơnhoàl Cư̆ Mgar den brê gơlơh bè neh gơtìp mùs kơl aniai mờr jơh. Tus sền tàm mùl màl brê neh ờ geh tai bơh tŭ lơi mờ he kung ờ git sơl”.

Tàm tŭ brê gơtìp mus kơl uă, uă cau tờm brê tàm càr Dăk Lăk den ờ nền nòn tàm broă atbồ. Geh tŭ tài ngòt gơtìp đơs tus kơnòl, den tàng uă cau tờm brê ờ yal di mờ bơta mùl màl, lơh gơtìp mờ bơta tŭ anih lơh broă geh gơnoar tus lơh broă, brê neh ờ geh tai, ù brê neh gơtìp sơgràm tam phan, kal ke ngan kờñ bơsong.

Ồng Lê Văn Nuôi, Phó Củ tịc UɃÑZ kơnhoàl Buôn Đôn, càr Dăk Lăk đơs mùl màl: “Lài jơh là ờ git, sền wơl ờ jơh, dơ̆ bàr tai là pồn broă lơh ờ niam. Mpồl làng bol kis ntrờn mùs kơl chi brê pơgăp mờ do 10 nam mờ tus tŭ do hơ̆ sồng gŏ, den mùl màl cau tờm brê ngòt tìs den tàng ờ khin yal mờ gơnoar atbồ ƀòn lơgar, mờ ală gah lơh broă tam gah do bơh càr dê nàng jòi geh broă lơh di pal. Tŭ gŏ bè hơ̆ den ờ git kơnòl gơwèt mờ cau lơi, hơ̆ sồng tam lah is”.

Nam 2023 mpồl lơh broă geh gơnoar càr Dăk Lăk gŏ, lơh sră lơh glài 1 rơbô 36 dơ̆ tìs mờ adăt boh lam bè brê bơnơm, 246 lồ brê gơtìp mus kơl aniai. Khà dơ̆ mờ bă brê gơtìp mus kơl ờ geh kờp tơl, ờ hềt yal di mờ mùl màl. UɃÑZ càr Dăk Lăk kung đơs, broă gŏ, tam dră, bơsong ală broă lơh tìs mờ adăt boh lam brê bơnơm gam tơngŏ geh uă broă lơh ờ pràn. Broă mus kơl, kă bro, pơn diang phan brê ờ di pal, sơgràm ù brê tam phan, sơgràm mờ sơgràm tai ù brê kung gam gơtìp kal ke ngan. Ồng Nguyễn Hoài Dương, Kwang atbồ Sở Nông nghiệp mờ Phát triển Nông thôn càr Dăk Lăk pà git, bơta kơlôi rơcang ngan tŭ do là broă làng bol kis ntrờn tus mus kơl brê, sơgràm ù brê uă ngan tàm jơh ală kơnhoàl. Bơta gơrềng ờ niam bơh broă do là dờng ngan mơya càr ờ hềt geh broă lơh geh cồng nha, kờñ ngan tus mờ dà lơgar sền gròi. Ồng Nguyễn Hoài Dương pà git: “Uă ngan tiah gam tàm bơta làng bol kis ntrờn khăt gơboh kung gam ờ hềt kơ̆ kơl jăp tiah ơm kis, lơh gơtìp uă ngan hoàc huơr bè mus kơl aniai brê, sơgràm ù ờ di mờ adăt boh lam. Tềng đăp mờ bơta do, càr kung neh đơng lam ală sở, gah lơh broă, ală kơnhoàl lơh ală rơndăp broă lơh kơl jăt broă làng bol kis ntrờn. Mơya, tŭ do gam gơtìp mờ ală bơta kal ke, priă bơh Dà lơgar tă ai ală broă lơh kơl jăp làng bol kis ntrờn khăt gơboh gam ờ uă”.

Mờ bơta mùl màl brê gơtìp mus kơl uă ngan, cau mus kơl brê sền ờ sơ̆p adăt boh lam, tàm tŭ hơ̆, uă cau tờm brê ờ sền gròi tàm broă atbồ, uă cau tờm brê ờ tơl pràn tàm broă sền gàr brê, uă ù tiah tàm càr Dăk Lăk, brê di gơlan gơtìp roh jơh.