Drim ngai 5/06, đơs tàm dơ̆ lam lơh, kwang đơng lam bồ càr Kon Tum đơs sùm gơtha kwơ màng bơh “Sa tềp tam chi sùm sùm kah ưn ngài Wa Hồ” tàm broă sền gàr tiah ơm kis mờ cồng nha geh ngan mờ tơm chi dê cèng wơl ai rài kis in; mơkung hòi jà làng bol jơh nùs tam chi geh mƀur mờ tam brê, pơgồp bơnah lơh niam wơl ù, pleh ù gơtìp klàr bè tơngume bơh Ngai tiah ơm kis dunia 5/06 nam do dê.

Tơnơ̆ dơ̆ lam lơh, bal mờ tam tờm chi geh mƀur, càr Kon Tum lam lơh broă tam 3 rơbô lồ brê. Tàm hơ̆, Ủy ƀan Ñân zân 10 kơnhoàl, ƀòn dờng bơh càr dê dong kờl làng bol tam mờr 2 rơbô 800 lồ mờ rlau 200 lồ bơh ală mpồl cau tờm sền gàr brê dê dờp lơh.

Drim òr, tàm ƀòn dờng Buôn Ma Thuột, càr Dăk Lăk neh lam lơh “Satềp tam chi rài rài kah ưn ngài Wa Hồ”. Do kung là broă lơh wèt tus tơnkah 120 nam Ngai crơng gơs càr Dăk Lăk, pơgồp bal lơh geh cồng nha broă lơh “Tam 1 tơmàn tờm chi” geh Cíñ phủ lam lơh.

Tàm ală nam do, ală kấp, ală gah lơh broă, ală tiah, anih lơh broă bal mờ làng bol kis tàm càr Dăk Lăk neh dờp bal, tus bal tàm broă tam chi, tam brê mờ sền gàr brê. Nam 2023, gùt càr neh tam geh rơlao 4 rơbô 500 lồ brê, geh rơlao 252% broă rơndăp lơh geh ai. Tàm ƀòn dờng Buôn Ma Thuột là dùl tàm ală tiah drà geh khà tờm chi uă ngan gùt lơgar dê. Tàm dơ̆ lam lơh satềp tam chi drim òr, ală kwang bàng bal mờ làng bol neh tam git nđờ rơhiang tờm ƀằng lăng jăt gah gùng Võ Nguyên Giáp. Tơnơ̆ mờ dơ̆ lam lơh, geh 5 rơbô tờm chi geh pơn jăt tai tam tàm ală xã, sơnah ƀòn tàm ƀòn dờng dê.