VOV4.K’ho- Di dơ̆ pơrjum dơ̆ 3, Quôk hội khoá 15 geh bơyai lơh tàm càr lơgar Hà Nội, Ủy ƀan jơi bơtiàn Kòn cau bơyai lơh dơ̆ tìp mat ală kwang bàng Quôk hội là kwang bàng tàm Mpồl duh broă jơi bơtiàn Kòn cau.

Tàm dơ̆ tìp mat, Ƀộ trưởng Củ ñiệm Ủy ƀan jơi bơtiàn Kòn cau ồng Hầu A Lềnh neh yal tus mờ ală kwang bàng bè bơta lơh jat broă lơh jơi bơtiàn kòn cau, broă lơh jơi bơtiàn kòn cau mờ bàr pe broă gam geh ală Kwang bàng Quôk hội, cau tĕ khà mờ làng bol sền gròi. Jat hơ̆, tŭ do Ủy ƀan jơi bơtiàn Kòn cau  đơng lam, lơh 38 rơndap broă lơh, broă lơh jơi bơtiàn kòn cau kờñ lơh ngan ngồn gùng dà broă lơh bơh Đảng, Nghị quyết bơh Quôk hội, jơnau sồr lơh bơh Cíñ phủ mờ Thủ tướng Cíñ phủ dê, sền gròi ală broă lơh bơtàu tơnguh sa – mpồl bơtiàn, bơtàu tơnguh mpồl cau lơh broă là làng bol jơi bơtiàn kòn cau, broă lơh gơwèt mờ cau geh bơngă pin dờn tàm tiah làng bol kòn cau dùl ết nă cau... Ngan là, broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol kòn cau dùl ết nă cau mờ tiah kơh bơnơm tơngai lơh broă bơh nam 2021-2030, Ƀộ trưởng, Củ ñiệm Ủy ƀan jơi bơtiàn Kòn cau ồng Hầu A Lềnh đơs là, do là gùng dà broă lơh dờng bơh Đảng mờ dà lơgar dê bè lơh jat broă lơh jơi bơtiàn kòn cau, pal tă bơsong ală bơta kal ke, kòl yan nàng lơh jat niam broă lơh do dê.

Cau mblàng K’Hạnh