Gơrềng tus mờ dơ̆ rềs àr tàm kơnhoàl Chư Pưh, càr Gia Lai lơh 3 nă cau tàm Mpồl coh plai Hoàng Anh Gia Lai (HAGL) gơtìp chơ̆t, ngai òr (13/08), ồng Khuất Việt Hùng, Phó Kwang atbồ Cuyên trác Ủy ƀan Lơngăp lơngai gùng lòt Dà lơgar neh tus lơh broă mờ UɃÑZ kơnhoàl Chư Pưh bè broă gàr niam lơngăp lơngai gùng lòt tàm gơl gùng 14 lòt gan kơnhoàl do mờ còp să, pơn dờm cau tàm hìu nhă cau gơtìp.

Jăt jơnau yal, bơh bồ nam tus tŭ do, tàm kơnhoàl geh 13 dơ̆ rềs àr gùng lòt, lơh 10 nă cau gơtìp chơ̆t, 4 nă cau sồt să. Pal kah ngan geh uă ală dơ̆ rềs àr gơlik geh tàm 31 kơi sồ gùng 14 gơl lòt gan kơnhoàl do dê. Đơs tàm dơ̆ lơh broă, ồng Khuất Việt Hùng sồr UɃÑZ kơnhoàl Chư Pưh hòi jà uă ngan ală mpồl tơmù bơta hoàc huơr bơh dơ̆ rềs àr pa do, gờñ lùp khào; mpồl lơh broă geh gơnoar tàm càr Gia Lai bơsong jơh ală dơ̆ tìs. Kơnhoàl Chư Pưh pal gờñ crăp camera sền gròi bơta niam tàm gùng lòt. Ủy ƀan Lơngăp lơngai gùng lòt Dà lơgar kơ̆p kờñ càr Gia Lai geh ală broă lơh jŏ jòng bè broă ai broă rơndăp ù tiah lơh ƀòn ơm kis jăt bàr gah gùng 14 nàng gàr niam bơta lơngăp lơngai gùng lòt.