VOV4.K’ho- Mho ngai 09/02, ồng Khuất Việt Hùng, Phó Củ tịc drơng broă Ủy ƀan ờdo ờdă gùng lòt dà lơgar bal mờ mpồl kwang bàng neh mut tàm càr Gia Lai nàng sền tiah gơlik geh rềs àr, pơgồp bal mờ kwang đơng lam bồ càr đơng lam bơsong jơnau gơ lời wơl bơh dơ̆ rềs àr ngòt rơngơt lơh 6 nă cau chơt, 3 nă cau gơtìp sồt să gơlik geh tàm àng drim gờñ ngai 09/02.

Tơnơ̆ tŭ gơlik geh rềs àr, ala mat Mpồl ờdo ờdă gùng lòt càr Gia Lai neh lòt lùp còp, tam pà moat jrùm mờ dong kờl 3 tơlak đông ai 1 nă cau sồt să in, tơl hìu bơnhă geh cau chơt là 5 tơlak đông. Kơnhoàl Đăk Đoa kung dong kờl 3 tơlak đông ai 1 nă cau gơtìp sồt să mờ 5 tơlak đông ai hìu bơnhă geh cau chơt in. Tơnơ̆ dơ̆ lơh broă, Mpồl kwang bàng bơh Ủy ƀan ờdo ờdă gùng lòt dà lơgar dê neh tus lùp còp, pơn dờm pơnđiang ală hìu bơnhă geh cau tờm gơtìp chơt tàm dơ̆ rềs àr ngòt rơngơt sơrlèt gan bơta moat jrùm, pơn jat tai brồ guh tàm rài kis.

Cau mblàng K’Duẩn