Pơn jăt tai dơ̆ pơrjum mìng tơngume adat boh lam nhai 04, ngai do 14/04, Ủy ƀan Thường vụ Quôk hội ai jơnau đơs mờ jơnau dan bơcri priă lơh Rơndăp broă lơh gùng rơndeh tàm tơrbŏ bal kơnhoàl ù tiah, tàm tơrbŏ bal ală càr: Khánh Hoà- Ninh Thuận mờ Lâm Đồng.

Rơndăp broă lơh geh bă ù ơnàng ngui kờp jơh là 75 lồ; jòng kờp jơh tus 57 kơi sồ. Anih bơh sơnrờp tam tìp mờ Gùng rơndeh dờng 27C càr Lâm Đồng, anih dŭt ndơl tàm nhàr càr Khánh Hoà mờ Ninh Thuận. Kờp jơh priă bơcri bơh sơnrờp pơgăp 1 rbô 929 tơmàn đong. Digơlan geh lơh gơs jơh gùt gơl gùng do tàm nam 2027. Củ tịc Quôk hội ồng Vương Đình Huệ đơs loh: Rơndăp broă lơh geh gơtha kwơmàng ngan, pơgồp bơnah bơtàu tơnguh ală gùng lòt rê bơh tiah kơh bơnơm đah mat tơngai mŭt càr Khánh Hoà, geh 2 kơnhoàl: Khánh Sơn mờ Khánh Vĩnh. Mơkung lơh geh gùng lòt rê tàm tơrbŏ bal kơnhoàl ù tiah mờ ală kơnhoàl tiah kơh bơnơm bơh ală càr: Ninh Thuận mờ Lâm Đồng dê, dong kờl bơtàu tơnguh lơh sa- mpồl bơtiàn, sơlơ sền gàr niam dà lơgar mờ lơngăp lơngai.