VOV4.K’ho- Mho ngai 15/09, ai jơnau đơs rơcăng pơrjum dơ̆ 4 bơh Quôk hội khoă XV dê, Kwang ătbồ Mpồl cau gơnoar cih Quôk hội dê mơkung là Kwang ătbồ Cơldŭ lơh broă Quôk hội ồng Bùi Văn Cường pà gĭt, kờp dŭ kờp jơh tŭ jiơ lơh broă bơh dơ̆ pơrjum dơ̆ 4 dê là 23 ngai mờ nggùl. Quôk hội rơcăng mŭt pơrjum tàm ngai 20 nhai 10 tus.

Ồng Bùi Văn Cường, Kwang ătbồ Mpồl cau gơnoar cih Quôk hội dê pà gĭt, Cíñ phủ dan bơtơl tơngume yal mờ Quôk hội in sền swì, lơh nền Rơndăp ù tiah jơh kâp dà lơgar tơngai bơh nam 2021- 2030, gùng dà tus nam 2050; yal mờ Quôk hội in sền swì, ring bal Kơrnoăt bè lơh tơrlòng lài pà gơnoar sac rwah ngui ƀàng sồ rơndeh ô tô bơh tàm pơrlòng giă mờ sền swì, ring bal Kơrnoăt bè lơh tơrlòng lài bàr pe gùng dà broă lơh, kơrnoăt krơi is bơtàu ƀòn dờng Buôn Ma Thuột, càr Dăk Lăk mờ sền swì broă lơh bơsong bơta gam gơkòl, bơta ờ hềt dipal tàm bàr pe trạm tă priă halà rơndăp broă lơh BOT dê.

Tơnơ̆ hơ̆, Ủy ƀan Thường vụ Quôk hội neh pơrjum tơn jơh dơ̆ pơrjum dơ̆ 15, đơs pơndŭt dơ̆ pơrjum, ồng Vương Đình Huệ, Củ tịc Quôk hội sồr ală anih lơh broă pơn jăt tai lơh sir ală jơnau yal jăt sền tơngume, kwơmàng là Jơnau yal cồng nha jăt sền tơngume “Broă lơh jăt gùng dà broă lơh adat boh lam bè lơh jăt tềm pềr, kơryan pơhì pơhà tơngai bơh nam 2016- 2021” nàng yal mờ Quôk hội tàm pơrjum dơ̆ 4, Quôk hội khoă XV.

Cau mblàng Lơ Mu K’Yến