VOV4.K’ho- Pơn jăt tai pơrjum dơ̆ 10, drim do, ngai 25/04, Ủy ƀan Thường vụ Quôk hội ai jơnau đơs bè jơnau yal bơh Cíñ phủ dê bè cồng nha lơh jăt tềm pềr, kơryan pơhì pơhà nam 2021.

Tàm broă lơh rơcăng lài bơcri priă, geh uă rơndăp broă lơh ờ hềt tơl sră pơ àr bơcri priă, ờ tơl bơta tam pà priă jền, gơlam tus ờ lơh geh jơnau kờñ neh ai tơlik tơn bơh ală broă bơh sơnrờp; broă kờp sền, tàm ntrờn, bơtơl priă ai ală rơndăp broă lơh ai priă jền niam, geh jơnau kờñ priă nàng lơh sir ală rơndăp broă lơh ờ hềt geh lơh di tŭ, ngac ngar.

Do là bơta gơkòl sùm jŏ jòng uă nam do, Cíñ phủ kờñ pal bơsong jơh. Tàm nam 2021, 9 ƀộ mờ 21 tiah kung gam ờ hềt tam pà nền cê priă bơcri dà lơgar dê; geh 10 tiah ờ hềt tam pà jơh mờ kờp jơh priă jền. Cau tĕ khà kơ̆p kờñ ală jơnau gam gơkòl tàm tŭ lơh jăt broă lơh kơrnoat boh lam bè lơh jăt tềm pềr, kơryan pơhì pơhà geh cribơyai dùl bă loh làng tàm dơ̆ pơrjum bơh Ủy ƀan Thường vụ Quôk hội dê ngai do.

Cau mblàng Lơ Mu K’Yến