VOV4.K’ho- Pơn jăt tai pơrjum dơ̆ 16, drim do 11/10, Ủy ƀan Thường vụ Quôk hội ai jơnau đơs tàm ală jơnau yal bơh Cíñ phủ dê bè broă lơh jăt broă rơndăp lơh bơtàu tơnguh lơh sa- mpồl bơtiàn nam 2022 mờ kờp dŭ lài kes priă dà lơgar. Nam 2022, cồng nha lơh jăt broă rơndăp lơh bơtàu tơnguh lơh sa- mpồl bơtiàn digơlan geh lơh geh mờ sơrlèt 14 tàm 15 broă jàu pơndrờm mờ broă rơndăp lơh bơh Quôk hội dê jàu, tàm hơ̆ gơguh lơh sa kờp dŭ geh pơgăp 8%, sơrlèt jơnau kờñ bơh 6 tus 6,5%, lơh gơlik bơnàng jă kwơmàng ai ală nam pơn jăt tai in lơh jăt jơnau kờñ gơguh lơh sa bơh broă rơndăp lơh 05 nam bơh nam 2021- 2025.

Tàm nam 2023, yal lài broă gơlik geh tàm dunia mờ tàm lơgar geh tŭ niam, bơta ƀươn mờ kal ke, bơta lòng mơya kal ke, bơta lòng uă rlau, ngan rlau gơwèt mờ broă đơng pơlam lơh sa dờng. Den tàng bè hơ̆, Cíñ phủ geh jơnau kờñ pơn jăt tai ai lài gàr kơ̆ kơ̆ kơl jăp lơh sa dờng, gròi sền roh giă priă, sơlơ lơh gơguh lơh sa, gàr niam ală jơnau tàm pơnring dờng bơh rài lơh sa dê. Kràñ cê jơh nùs mờ lơh mhar tŭ tơngai lơh jăt ală bơta bơtàu tơnguh mhar kwơmàng. Broă lơh bơtàu tơnguh wơl mờ bơtàu tơnguh lơh sa- mpồl bơtiàn, 3 Broă lơh jơnau kờñ dà lơgar: Bơ̆t bơtàu ƀòn lơgar pa, bơtàu tơnguh lơh sa mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm mờ tơn jơh jơgloh tơrmù rƀah kơ̆ kơl jăp jŏ jòng.

Cau cih VOV Tây Nguyên- Cau mblàng Lơ Mu K’Yến