VOV4.K’ho- Pơn jat tai dơ̆ pơrjum tơngume adat boh lam nhai 9, drim do (22/9), Ủy ƀan Thường vụ Quôk hội ai jơnau đơs tàm Rơndap lơh Adat ù tiah (tam gơl).

Ủy ƀan Thường vụ Quôk hội cribơyai rơndap lơh Adat ù tiah (tam gơl)

Do là dùl rơndap lơh Adat dờng, geh kuơ dờng ngan tàm rài kis lơh sa mpồl bơtiàn bơh dà lơgar dê, geh gơ rềng uă ngan tus uă gah bơh rài kis lơh sa - mpồl bơtiàn dà lơgar dê. Jat kờp dŭ, rơndap lơh Adat do geh Quôk hội cribơyai, ai jơnau đơs dơ̆ sơn rờp tàm pơrjum dơ̆ 4, Quôk hội khoă 15. Là anih lam lơh gơnăp gơnoar atbồ dà lơgar bè gah ù tiah, Ƀộ trưởng Ƀộ Tài nguyên mờ Môi trường ồng Trần Hồng Hà pà git: Rơndap lơh Adat ù tiah (tam gơl) wèt tus jơnau cih gàr niam lơh nền khà priă ù loh làng, song dơpă mờ dipal mờ khà priă drà kă bro nàng làng bol mờ mpồl lơh sa kă bro ndrờm geh dờp kuơ. Ồng Trần Hồng Hà kung đơs nền, broă sơrbì bơta lơh nền khà priă ù là pal geh mờ ngui khà priă ù di mờ drà kă bro rlau.

Cau mblàng K’Duẩn