VOV4.K’ho- Pơn jăt tai broă pơrjum dơ̆ 9, ngai 14/03, Ủy ƀan Thường vụ Quôk hội iăt 2 Mpồl jăt sền tơngume yal ồng nha bơh sơnrờp bè “Broă lơh jăt ală Kơrnoăt bơh Ủy ƀan Thường vụ Quôk hội dê bè broă rơndăp tăp sèng ală mpồl lơh broă sră pơ àr dà lơgar kâp kơnhoàl, kâp xã” mờ “Broă lơh jăt kơrnoăt boh lam bè wă làng bol mờ bơsong jơnau lùp, jơnau yă”.

03 nam do, jơh gùt lơgar neh gơmù geh 3 rbô 437 anih lơh broă tàm kâp xã mờ 429 anih lơh broă tàm kâp kơnhoà; gơmù geh 706 nă kwang bàng, kông cưk kâp kơnhoàl, 9 rbô 694 nă kwang bàng, kông cưk kâp xã mờ 8 rbô 448 nă cau lơh broă ờ lơh kơnòl broă sùm tàm kâp xã. Tơngai bơh nam 2019- 2021 neh tềm pềr tă rlau 2 rbô tơmàn đong, bơh hơ̆ neh geh tai priă jền bơcri nàng bơtàu tơnguh lơh sa- mpồl bơtiàn, lơh jăt broă lơh tơn jơh jơgloh, tơrmù rƀah, bơ̆t bơtàu ƀòn lơgar pa, pơgồp bơnah lơh jăt dùl ròt bal ală broă lơh dong kờl ờdo ờdă rài kis mpồl bơtiàn, tơnguh uă bơta niam rài kis làng bol in.

Broă lơh jăt kơrnoat boh lam bè wă làng bol mờ bơsong jơnau lùp, jơnau yă pà gŏ khà dơ̆ cau lòt tus anih lơh broă sră pơ àr dà lơgar dê nàng lùl, yal yă, sồr mờ yal wơl gơguh; khà dơ̆ mpồl gal cau gơguh; khà dơ̆ broă gơwèt gơnăp gơnoar bơsong bơh anih lơh broă dà lơgar dê gơmù.

Cau mblàng Lơ Mu K’Yến