VOV4.K’ho - Pơn jăt tai broă pơrjum jăt tơngu me adăt boh lam, drim do (23/09), Ủy ƀan thường vụ Quốk hội pơgồp jơnau đơs bè rơndăp broă sền gròi nền nòn mờ tơngu me ală jơnau yal bơh Mpồl kwang bàng jăt sền bơh Quốk hội bè “Broă hòi jà, atbồ mờ ngui ală bơta pràn drơng broă sơndră mờ kòp Kovid-19; broă lơh jăt adăt boh lam bè lơh sơnơm tàm ală tiah, lơh sơnơm rơcang sơndră”.

Tàm pơrjum dơ̆ 3, Quốk hội neh pờ tê ring bal Nghị quyết bè broă crơng gơs Mpồl kwang bàng jăt sền jăt tơngu me “Broă hòi jà, atbồ mờ ngui ală bơta pràn drơng broă sơndră mờ kòp Kovid-19; broă lơh jăt adăt boh lam bè lơh sơnơm tàm ală tiah, lơh sơnơm rơcang sơndră. Tơngu me jăt sền là sền wơl cồng nha neh lơh geh, bơta ờ pràn, kal ke, gơkòl, ai geh bơta tờm, ai tơngŏ loh làng kơnòl bơh ală anih lơh broă, mpồl lơh broă, cau dùl nă să tàm broă: Hòi jà, atbồ mờ ngui ală bơta pràn drơng broă sơndră mờ kòp Kovid-19; lơh jăt broă lơh adăt boh lam bè lơh sơnơm tàm ală tiah, lơh sơnơm rơcang sơndră. Mờ dan geh broă tơnguh uă cồng nha hòi jà, atbồ mờ ngui ală bơta pràn rơcang sơndră mờ kòp gơtờp; lơh jăt adăt boh lam bè lơh sơnơm tàm ală tiah, lơh sơnơm sơndră mờ kòp mờ lơh gơs adăt boh lam geh gơrềng bal.

Cau mblàng Ndong Brawl