VOV4.K’ho- Drim ngai 15/02, tàm hìu lơh broă Quôk hội, mut pơrjum dơ̆ 8, Ủy ƀan Thường vụ Quôk hội. Geh lơh bơh ngai 15 tus ngai 17/02, tàm dơ̆ pơrjum do, Ủy ƀan Thường vụ Quôk hội ai jơnau đơs tàm uă tơngume kuơmàng. Ai jơnau đơs tàm Rơndap lơh Adat Kảñ sát kơ động, ală kwang bàng kơlôi rơcang tŭ rơndap lơh Adat cih kảñ sát kơ động geh mut tàm anih lơh broă, mpồl lơh broă, anih ơm bơh cau dùl nă să dê. Gơ wèt mờ broă mut tàm anih lơh broă bơh anih ala mat lơh broă mờ lơgar ndai, anih ala mat lãñ sự lơgar ndai, anih ala mat mpồl lơh broă dunia.. pal lơh jat jơnau cih bơh adat boh lam Việt Nam mờ điều ươk dunia dê. Đơs tàm pơrjum, Củ tịc Quôk hội ồng Vương Đình Huệ sồr mpồl kảñ sát kơ động pal tơnguh bơta ngac ngar, jak chài, rơcang sơndră mờ tiah gơlik geh broă ờ niam. Củ tịc Quôk hội ồng Vương Đình Huệ kung sồr ai mpồl do tus tàm ală tiah kuơmàng. Gàr bơta đơng lam bồ ring bal tàm broă ai mpồl kảñ sát kơ động tus.

Cau mblàng K’Duẩn