Củ tịc Quôk hội ồng Vương Đình Huệ đơs loh, pơrjum dơ̆ 31, Ủy ƀan Thường vụ Quôk hội ai jơnau đơs bè mblàng lơh loh, cih dờp gơ wèt mờ 7 rơndap lơh adat boh lam, geh: jơnau rơcang cih Adat Càr lơgar (tam gơl); jơnau rơcang cih Adat tam gơl, bơ tơl 2, 3 bơta bơh Adat tàm pơrlòng giă phan bơna; jơnau rơcang cih Adat rơndap lơh Anih cah rơña làng bol (tam gơl); jơnau rơcang cih Adat Gùng ù gờl; jơnau rơcang cih Adat rơndap tap sèng ring lơngai, lơngap lơngai lòt rê gùng ù gờl; jơnau rơcang cih Adat lơh sa mờ măi mok sền gàr dà lơgar, sền gàr dà lơgar mờ hòi jà lơh sa mờ măi mok; jơnau rơcang cih Adat Ƀảo hiểm xã hội (tam gơl). Củ tịc Quôk hội pà git, tơngume pal sền gròi tàm pơrjum là Ủy ƀan Thường vụ Quôk hội rơp lam lơh lùp mờ hơ jơnau lùp. Ƀộ trưởng Ƀộ Tài cíñ ồng Hồ Đức Phớc mờ Ƀộ trưởng Ƀộ Ngoại giao ồng Bùi Thanh Sơn rơp hơ jơnau lùp bè 2 mpồl broă gơ wèt gah priă jền mờ cribơyai broă mờ lơgar ndai.