Bŭ lah neh geh jơnau cih mơya broă lơh mblàng yal lơh loh lài do mìng rơ̆p lơh jăt jơnau pal jăt, ờ hềt geh jơnau cih mùl màl bè rơndăp tăp sèng, sră nggal bơyai lơh mblàng yal lơh loh ha là broă kờñ rơwah jơnau mblàng yal lơh loh, den tàng kung geh bơnah lơi lơh gơrềng tus cồng nha bơh pơrjum mblàng yal lơh loh.

Nàng tơmù bơta do, kơrnoăt sồ 969 bơh Ủy ƀan Thường vụ Quốk hội gơs anih pơlam gùng dà broă lơh mblàng yal lơh loh tŭ geh jơnau cih mùl màl, nền nòn tàm tơl bơnah broă nàng lơh jăt dơ̆ mblàng yal lơh loh. Broă Ủy ƀan Thường vụ Quốk hội gờñ lơh jăt Nghị quyết sồ 969 geh dong kờl tơnguh uă rơlao tai cồng nha broă lơh mblàng yal lơh loh tàm ală anih lơh broă bơh Quốk hội. Bơh tŭ hơ̆, tơnguh nùs nhơm rơcang lài bơh Quốk hội dê tàm broă di tŭ lơh wơl mờ ală bơta gơlik geh pah ngai tàm rài kis dê; lơh broă bal, jăt sền Cíñ phủ tàm broă bơsong ală bơta kwơ jal mhar gơ ai tơlik.