VOV4.K’ho- Pơn jăt tai broă pơrjum dơ̆ 11, ngai 13/05, Ủy ƀan Thường vụ Quôk hội sền swì broă rơcăng gùng dà tam pà priă kes priă dà lơgar tơngai bơh nam 2021- 2025 mờ nam 2022 ai ală ƀộ, anih lơh broă kâp dà lơgar mờ kâp ƀòn lơgar in lơh jăt 03 broă lơh jơnau kờñ dà lơgar dê; sền swì broă bơtơl broă rơndăp lơh kes priă dà lơgar nam 2022 tàm lơgar tam pà ai ală ƀộ, ngàñ, ƀòn lơgar in mờ ai jơnau đơs bè broă tơ wơl wơl priă càn rê ai càn wơl, ala măt Cíñ phủ gơ gơs ai pà kes priă dà lơgar.

Pơn jăt mờ hơ̆, Ủy ƀan Thường vụ Quôk hội kung ai jơnau đơs bè broă dan mờ Quôk hội sền swì, lơh nền gùng dà bơcri priă tơngai dơ̆ dùl ală rơndăp broă lơh lơh gùng rơndeh ntoăt răt Châu Đốc- Cần Thơ- Sóc Trăng; Khánh Hoà- Buôn Ma Thuột; Biên Hoà- Vũng Tàu. Do là ală rơndăp broă lơh kwơmàng dà lơgar dê gơwèt gơnăp gơnoar Quôk hội dê lơh nền gùng dà bơcri priă, geh ngui li la bơnah priă kes priă dà lơgar, ƀòn lơgar, priă bơcri dà lơgar di mơ tơngai mờ priă gơwèt bơnah priă gơhòi gơ jà lơh sa.

Cau mblàng Lơ Mu K’Yến