Geh bơyai lơh 4 ngai, tàm pơrjum do, Ủy ƀan Thường vụ Quốk hội pơgồp jơnau đơs tàm 16 tơngu me kwơ màng nàng rơcang ai pơrjum dơ̆ 5, Quốk hội khoă 15 in. Đơs tàm dơ̆ sơn đờm pơrjum, Củ tịc Quốk hội ồng Vương Đình Huệ sồr Ủy ƀan Thường vụ Quốk hội kơlôi sơnơng pơgồp jơnau đơs bè broă pal geh tam gơl, bơtơl rơndăp broă cih adăt boh lam ală mpồl ai càn priă (tam gơl).

Tàm drim ngai òr (09/05), geh pơgồp jơnau đơs tàm jơnau yal bè broă tơnguh bơtàu lơh sa mpồl bơtiàn mờ priă jền kes priă tàm ală nhai bồ nam do, Ủy ƀan Thường vụ Quốk hội đơs là: Yal lài Quý II lơh sa gơtìp kal ke rơlao mờ Quý I, bơta do ai geh bơta lòng dờng màng ngan gơwèt mờ Cíñ phủ tàm broă đơng lam lơh sa dờng ală Quý pơn jăt tai nàng lơh ngan geh jăt jơnau kờñ gơguh GDP 6,5% ai jơh gùt nam in. Ƀộ trưởng Ƀộ Kế hoạc mờ Đầu tư ồng Nguyễn Chí Dũng pà git: Bơta lơh sa mpồl bơtiàn nhai 4 mờ 4 nhai bồ nam neh lơh geh uă cồng nha niam, lơh sa dờng kơl jăp, khà priă phan kă bro gơguh geh sền gròi.