Cribơyai tàm pơrjum, Ủy ƀan Thường vụ Quôk hội sồr rơndăp ù tiah tiah drà pal geh bơta sền sơnơng di pal, geh broă lơh jŏ jòng, ki ngàm kơrnoat boh lam drà kă bro mờ jơnau pal jat bơtàu tơnguh kơ̆ kơl jăp; ai kòn bơnus mờ bơta niam rài kis lơh bơta tờm, niam chài mờ niam jak tiah drà lơh bơnàng jă bơtàu tơnguh; gàr niam pơlam gùng dà tàm pơgồp bal đah tiah drà mờ ƀòn lơgar, di pal mờ bơta geh ngan geh bơta tàm bơrlŭ bal đah tiah drà mờ ƀòn lơgar.

Củ tịc Quôk hội ồng Vương Đình Huệ tơngkah, pal kờp sền wơl nàng lơh loh, bơsong bơta gơrềng đah lơh ngan ngồn tiah drà mờ bơt bơtàu ƀòn lơgar pa; bơta gơrềng đah lơh ngan ngồn tiah drà mờ bơtàu tơnguh lơh sa tiah drà; rơndăp ù tiah gơ dờp mờ tam gơl nhơm trồ tiah. Củ tịc Quôk hội đơs sùm, pal kơlôi sơnơng bơsong ală bơta kal ke kòl yan tàm bơta geh ngan bè broă jàu kwơ màng ngan tàm rơndăp ù tiah tiah drà, rơndăp ù tiah ƀòn lơgar, kung bè bơta tam gơl rơndăp ù tiah lơh bè lơi nàng gơ in di mờ ală bơta gam geh.