Geh mờr 500 nă làng bol tus bơh 5 xã, geh: Đăk Nên, Đăk Ring, Măng Bút, Đăk Tăng, Măng Cành bơh kơnhoàl Kon Plông dê tus bal ală ơdŭ bơto pơlam. Bơh ơdŭ bơto pơlam làng bol, uă ngan là làng bol kòn cau Sơdàng geh phàt sră cih jơnau yal, sră nggal pơlam rơcang lài drơng, pleh mờ tơrluh ù.

Ờ mìng tus bal tơl làm mờ sền gròi iat kơno, làng bol tàm ală xã tiah tờm klŏ tơrluh ù tàm kơnhoàl Kon Plông, càr Kon Tum kung neh rơcang lài jơnau lùp, đơs ală bơta kơlôi rơcang, bơta ờ suk he dê nàng kwang bàng in mblàng lơh loh. Tiến sĩ mò Bùi Thị Nhung, dùl tàm 5 nă cau geh jơnau git wă jrô tus bơh Viện Vật lý điạ kầu pà git, kung bơh broă tìp mat, cribơyai tơn mờ làng bol 5 xã tiah tờm klŏ tơrluh ù, Viện Vật lý điạ kầu rơp pơn jat tai kơlôi sơnơng, geh ală broă lơh dipal mờ bơta geh ngan ƀòn lơgar dê, nàng làng bol in gơ dờp niam mờ bơta tơrluh ù.