VOV4.K’ho- Ngai 03/10, Sở Y tế ƀòn dờng Hồ Chí Minh pà gĭt cồng nha xét nghiệm ală broă gĭt nền rơndăp tăp sèng gen đơs nền dùl nă cau ùr bơtờp kòp rang dồ. Do là cau bơtờp kòp rang dồ bơh sơnrờp geh gŏ tàm Việt Nam. Jăt Ƀộ Y tế yal, do là cau ùr 35 sơnam, ơm kis sùm tàm ƀòn dờng Hồ Chí Minh; sơnđờm bơtờp kòp bơh ngai 18/09/2022 tŭ gam lòt nhơl tàm Dubai (bơh nhai 7/2022 tus ngai 22/09/2022 rê hờ Việt Nam) bal mờ bơta gơ tơngŏ kòp duh să geh bal să jan glar, mrềt tàm să, jê puăc, jê bồ mờ bơsiă, geh ală toh pơrhê, dơ kiăt tềng đah tê, să jan mờ muh mat.

Tơnơ̆ tŭ rê hờ Việt Nam tàm ngai 23/9/2022 tơn, cau kòp do neh lòt kham tàm Hìu sơnơm Từ Dũ mờ pin bơtờp kòp bơtờp, geh jun tus Hìu sơnơm Kòp đah kơltau ƀòn dờng Hồ Chí Minh. Tàm do, cau kòp geh ai ơm yah is, ai mhàm xét nghiệm, tus ngai 25/09, cau kòp geh cồng nha bơh sơnrờp bơtờp mờ kòp rang dồ. Tŭ do, cau kòp să jan pràn kơldang, ờ duh să, gam geh pơn jăt tai ai ơm yah is, sơm kòp tàm Hìu sơnơm Kòp Ñiệt đới ƀòn dờng Hồ Chí Minh.

Cau cih VOV Tây Nguyên- Cau mblàng Lơ Mu K’Yến