VOV4.K’ho- Mho ngai 08/6, Thủ tướng Phạm Minh Chính neh wă Ƀộ trưởng Ƀộ Quôk phòng lơgar Ấn Độ ồng Rajnath Singh gam geh dơ̆ lòt còp ngan ngồn lơgar Việt Nam. Tàm dơ̆ wă, Thủ tướng đơs nền Đảng, Dà lơgar, Cíñ phủ mờ làng bol Việt Nam jơh nùs ki ngàm mờ sùm kơp kờñ chồl pràn bơtàu tơnguh git gơp lơh bơyô, bơhiàn ờs mờng, lơgar lơh broă bal jŏ jòng tơl làm Việt Nam- Ấn Độ tàm bơnàng jă ală bơta tơrbŏ bal kah yau mờ niam chài jŏ rài, ală bơta kuơ ndrờm bal, bơta pin dờn mờ git wă bal mờ gơp, kung bè jơnau hơ pơrgon bal gơ wèt tus mờ adat boh lam dunia.

Thủ tướng Phạm Minh Chính wă Ƀộ trưởng Quôk phòng Ấn Độ

Tàm dơ̆ tìp mat, 2 gah cribơyai bè ală broă tàm ală lơgar rềp bal mờ dunia mờ jơh bal 2 gah sền gròi, ring bal sơlơ tơnguh rlau tai broă tàm lùp, pơgồp bal tàm ală dơ̆ cribơyai uă lơgar, lơh broă bal tus bal sền gàr ring lơngai Liên hợp quôk, tơnguh git gơp đah mpồl ASEAN mờ lơgar Ấn Độ, đơs nền gơnoar broă lơh tờm bơh mpồl ASEAN dê tàm rơndap tap sèng lơngăp lơngai tiah do. 2 gah tam pà jơnau đơs bè bơta kuơmàng bè broă gàr sùm ring lơngai, kơ̆ kơljap, lơngăp lơngai, ờdo ờdă, khat gơboh gùng dà lềng mờ gùng rơndeh par tàm dà lềng đah mat tơngai lik; bơsong tam pìt tam phà mờ ală broă lơh ring lơngai jat adat boh lam dunia.

Cau mblàng K’Duẩn