Tàm dơ̆ lòt còp bơh Mpồl kwang bàng kâp dờng ala măt Đảng Kộng sản lơgar Cuba dê lòt còp mờ lơh broă tàm lơgar Việt Nam, drim ngai 04/05, Mpồl kwang bàng kâp dờng ala măt Đảng Kộng sản lơgar Việt Nam bơh mò Trương Thị Mai, Duh broă sùm Ƀan Ƀí thư, lam bồ neh tìp măt cribơyai mờ Mpồl kwang bàng kâp dờng ala măt Đảng Kộng sản lơgar Cuba.

Ala măt Đảng Kộng sản Dà lơgar Việt Nam, mò Trương Thị Mai jơh nùs gờm chờ wă rò Mpồl kwang bàng kâp dờng ala măt Đảng Kộng sản lơgar Cuba còp mờ lơh broă tàm lơgar Việt Nam mờ drơng lơh bal Cribơyai Jơnau cih tàm sră pơ àr dơ̆ V đah bàr Đảng; đơs nền tai nùs nhơm ờ tŭ lơi tam gơl bơh lơgar Việt Nam dê là ờ bài kờñ broă lơh wàng se kơryan mờ tam dră wơl mờ lơgar Cuba; tơlik nùs nhơm pin dờn bơh bơta lam bồ bơh Đảng Kộng sản lơgar Cuba dê, Đảng, Dà lơgar mờ Làng bol lơgar Cuba oh mi rơ̆p lơh jăt geh cồng nha ală Kơrnoăt Pơrjum dờng dơ̆ VIII sồr lơh. Tàm dơ̆ tìp măt cribơyai, bàr gah neh cribơyai mờ sền swì cồng nha lơh jăt Jơnau ring bal lơh broă bal mờ cribơyai tàm lùp bal tơngai bơh nam 2018- 2023 đah bàr Đảng dê, ngan là tàm ală broă lơh broă bal tờm ngan bè tàm pơgơl ală mpồl kwang bàng lòt còp bal mờ gơ̆p, cribơyai jơnau cih tàm sră pơ àr mờ bơta geh ngan tàm rài kis, broă lơh bơto kwang bàng, pơgồp yal tơngĭt jơnau, mblàng yal, pơgồp bal tàm ală dơ̆ pơrjum cribơyai, mpồl lơh broă bal dunia, mơkung gĭt nền ală broă tờm mờ gùng dà lơh broă bal đah bàr Đảng tàm tơngai tus, ring bal ai gĭt gơ̆p Đảng lơh bơnàng jă cíñ trị sơlơ tơnguh tai lơh broă bal đah bàr lơgar.