Tàm dơ̆ tìp mat mờ Củ tịc Quôk hội Hàn Quôk, Phó Củ tịc Quôk hội ồng Nguyễn Đức Hải đơs nền Việt Nam sền dờng màng bơtàu tơnguh bơta gĭt gơ̆p mờ Hàn Quôk mờ kơ̆p kờñ 2 gah pơgồp bal mờ gơ̆p lơh jrô ơnàng rlau tai bơta gĭt gơ̆p “Lơh broă bal jŏ jòng, tơl làm”, bơh hơ̆ pờ tơlik rài bơtàu tơnguh pa mŭt lơh broă ngan ngồn, geh cồng nha rlau tai tàm tơngai tus.

Nàng kờñ sơlơ tơnguh bơta gĭt gơ̆p đah anih lơh broă lơh adat boh lam 2 lơgar mŭt lơh broă uă mờ ngan ngồn, Phó Củ tịc Quôk hội ồng Nguyễn Đức Hải sồr 2 gah sền sơ wì bơtơl ală tơngume lơh broă bal jat tàm ală jơnau ring bal lơh broă bal neh kĭ đah 2 Quôk hội dê bơh nam 2013, sơlơ pơgồp bal, dong kờl bal mờ gơ̆p tàm ală dơ̆ pơrjum ală Nghị viện tàm tiah do mờ tàm dunia, tă pơgồp uă ngan tàm broă sền gàr ring lơngai, lơngap lơngai, kơ̆ kơljap bơh tiah do dê mờ tàm dunia.