VOV4.K’ho- Drim ngai 18/07, tàm Hà Nội geh lơh Dơ̆ tơngkah kir sơnrai 60 nam ngai lơh bơta gĭt gơ̆p cribơyai broă mờ lơgar ndai Việt Nam mờ Lào mờ 45 nam kĭ Hiệp ươk Gĭt gơ̆p lơh bơyô bal mờ Lơh broă bal đah bàr lơgar. Tổng Ƀí thư ồng Nguyễn Phú Trọng mờ Duh broă sùm Ƀan Ƀí thư Phó Củ tịc lơgar Lào ồng Bounthong Chitmany đơng lam mờ geh jơnau đơs tàm dơ̆ bơyai lơh tơngkah kir sơnrai.

Dơ̆ bơyai lơh tơngkah kir sơnrai 60 nam ngai lơh bơta gĭt gơ̆p cribơyai broă mờ lơgar ndai mờ 45 nam ngai kĭ Hiệp ươk gĭt gơ̆p lơh bơyô bal mờ lơh broă bal Việt Nam mờ Lào geh sền là dùl tŭ tơngai dờng màng ngan bơta bơta gĭt gơ̆p lơh bơyô bal dờng màng ngan, tam klăc bal uă ngan mờ lơh broă bal tơl làm đah Việt Nam mờ Lào; là tŭ nàng 2 gah bal mờ gơ̆p kah wơl jơnau kah yau khin cha jak chài bơh mpồl tam klăc bal tam lơh đah Việt Nam mờ Lào dê, bơta dong kờl mờ kờñ bal di nùs di tồr, nđăp ngkời ờ tŭ lơi tam gơl đah bàr Đảng, bàr Dà lơgar mờ Làng bol bàr lơgar dê tàm rài tam lơh jòi geh bơta lơngăp lơngai is ai bàr jơi bơtiàn in lài do mờ tàm broă lơh bơ̆t bơtàu, bơtàu tơnguh mờ sền gàr Dà lơgar tàm tơl lơgar ngai do. Do kung là broă lơh pơgồp bơnah sơlơ mblàng yal bơto bơtê ală rơnàng làng bol ngan là rơnàng kơnòm să bàr lơgar bè bơta kwơ mờ bơta dờng màng bơh bơta gĭt gơ̆p đah Việt Nam mờ Lào dê.

Cau mblàng Lơ Mu K’Yến