Bàr gah ring bal đơs là, tàm rlau 2 nam do, Ƀộ Kwang àng 2 lơgar neh jơh nùs pơgồp bal geh cồng nha tàm rơcang sơndră mờ ală bơta cau tìs, pơgồp bơnah gàr niam lơngăp lơngai cíñ trị, rơndap tap sèng, ring lơngai mpồl bơtiàn tàm tơl lơgar. Bè lơh broă bal tàm tơngai tus, Ƀộ Kwang àng 2 lơgar đơs nền, pơn jat tai pơgồp bal sền gàr lơngăp lơngai, ring lơngai ală broă cíñ trị kuơmàng geh bơyai lơh tàm tơl lơgar, lơh niam broă lơh sền gàr mờ dong kờl làng bol; pơn jat tai pơgồp bal rơcang sơndră geh cồng nha mờ ală bơta cau tìs gan ù tiah dà lơgar bè cau tìs hìñ sự, ma tuý, lơh sa, tac bro kòn bơnus, cau tìs blac pơrlồm bơh mạng viễn thông, mạng internet.

Mho dùl ngai bal, Ƀộ trưởng Ƀộ Kwang àng ồng Tô Lâm neh tus lùp lap ồng Thái Kỳ- Kwang atbồ Cơldŭ lơh broă Đảng Kộng sản dà lơgar Lo. Tàm dơ̆ wă, ồng Thái Kỳ jờng rơ bơta bơtàu tơnguh tàm git gơp lơh broă bal đah 2 Đảng, 2 lơgar tàm jơh ală gah broă jat nùs nhơm bơta git gơp lơh broă bal kuơmàng tơl làm.