Do kung là dơ̆ tơm bơh bơr kâp Ƀộ trưởng bơh sơnrờp đah Việt Nam mờ Mỹ kờp bơh tŭ 2 lơgar lơh geh bơta git gơ̆p Tam klăc lơh broă bal Jŏ jòng tơl làm. Ƀộ trưởng ồng Bùi Thanh Sơn đơs nền, Mỹ là lơgar tam klăc lơh broă bal geh gơnoar broă kwơmàng jŏ jòng bơh lơgar Việt Nam dê, đơs nền Việt Nam rơ̆p pơn jăt tai bal mờ Mỹ lam lơh gĭt gơ̆p Tam klăc lơh broă bal jŏ jòng tơl làm ngai sơlơ geh cồng nha, ngan ngồn mờ kơ̆ kơl jăp. Bàr nă Ƀộ trưởng kung tàm cribơyai bè ală broă lơh nàng kờñ lơh jrô ơnàng rlau tai gĭt gơ̆p 2 lơgar.

Bàr nă Ƀộ trưởng ring bal bè broă lơh jăt niam broă lơh Tơm bơh bơr kâp Ƀộ trưởng Ƀộ Ngoại giao nàng kờñ sơlơ tơnguh tai bơta lơh broă bal kơ̆ kơl jăp đah 2 Ƀộ Ngoại giao tàm tŭ lam lơh jăt ală jơnau ring bal kwang bàng kâp dờng; lơh jăt gơtùi ală broă lơh lơh broă bal 2 gah gam geh tŭ do, tàm hơ̆ geh broă lơh tơm bơh bơr bè cíñ trị- lơngăp lơngai- sền gàr dà lơgar, tơm bơh bơr broă lơh sền gàr dà lơgar, tơm bơh bơr gơnoar kòn bơnus; ring bal jơh nùs pơgồp bal lam lơh ală broă lơh tơngkah kir sơnrai 30 nam 2 lơgar lơh bè ờs wơl bơta gĭt gơ̆p tàm nam 2025.