Càr Kon Tum gam geh đơs là càr kal ke ngan rlau jơh bơh tiah Tây Nguyên dê bè phan bơna gùng lòt. Càr gam kơp kơnờm ngan geh gùng rơndeh ntoat mhar nàng ngui ală bơta pràn, bơta ƀuơn, ngan là tiah lòt nhơl dà lơgar Măng Đen. Ồng Lê Ngọc Tuấn, Củ tịc Anih duh broă làng bol càr Kon Tum pà git, tŭ ròt ală jơnau cih bè gùng rơndeh ntoat mhar tàm Tây Nguyên geh pơn đàng tàm ală anih yal tơnggit jơnau bơh VOV dê, kwang đơng lam bồ càr Kon Tum ndrờm iat, jat sền. Ròt ală jơnau cih neh đơs broă di mờ bơta geh ngan, đơs di bơta kơp kờñ bơh gơnoar atbồ mờ làng bol tàm ƀòn lơgar dê. Mìng is gơ wèt mờ càr Kon Tum, bơta chờ hờp neh tus gờñ, tŭ tàm rơndap ù tiah tiah Tây Nguyên dê tơngai bơh nam 2021 tus nam 2030 geh yal tàm lồi nhai 6 pa do, gùng rơndeh ntoat mhar Quảng Ngãi – Kon Tum neh geh Thủ tướng Cíñ phủ tơmut tàm rơndap ù tiah. Jat ồng Lê Ngọc Tuấn đơs, gùng dờng mờr pờ tơlik Kon Tum in bơta bơtàu tơnguh mhar: “Sền ală jơnau cih bơh VOV dê yal bè ală gùng rơndeh ntoat mhar tàm tiah Tây Nguyên añ gŏ gơ di ngan mờ càr. Tàm tơngume do, pa do, Thủ tướng Cíñ phủ kung geh jơnau đơs nền wơl, kung cih dờp sơl. Tŭ do, bol hi kờñ ngan gờñ lơh ală gùng rơndeh ntoat mhar. Mìng is gùng rơndeh ntoat mhar Quảng Ngãi – Kon Tum den 2 càr ndrờm geh jơnau dan mờ Cíñ phủ nàng jòi cau bơcri priă jat broă lơh PPP”.

Mò Nguyễn Thị Thanh Lịch, Phó Củ tịc drơng broă Anih duh broă làng bol càr Gia Lai pà git, bơta gơ kòl dờng ngan rlau jơh bơh càr Gia Lai dê đơs is, tiah Tây Nguyên đơs bal là phan bơna gùng lòt ờ hềt tơl. Ală nam do, càr neh lơh ngan tàm broă hòi jà ală cau bơcri priă, ngan là lơh bè lơi nàng lơh ală hìu măi lơh gơlik uă ai ală phan lơh gơs bơh suơn sre, broă lơh sa in, tơnguh cồng nha lơh sa mờ priă lơh geh làng bol in. Bulah bè hơ̆, bơta gơ kòl bè gùng lòt bè “bơkang” ală cau bơcri priă tus mờ Gia Lai. Jat mò Nguyễn Thị Thanh Lịch đơs, broă bơcri priă lơh ală gùng rơndeh ntoat mhar Pleiku- Quy Nhơn mờ gùng rơndeh ntoat mhar tiah đah tô – tiah đah jum dà lơgar hờ tiah đah mat tơngai mut geh gơtha dờng ngan gơ wèt mờ broă lơh gơs, bơtàu tơnguh ală hìu măi lơh gơlik phan uă, ală tiah, ală kụm lơh sa mờ măi mok mờ ală tiah lơh broă sa ngui măi mok pa. Bơh hơ̆, rơp bơsong dồ ròt ală bơta bè cau lơh broă, broă lơh ai làng bol tàm ƀòn lơgar in. Ala mờ pal lòt tus ală ƀòn dờng dờng, anih tờm lơh sa mờ măi mok nàng jòi broă lơh, priă lơh geh ờ kơ̆ kơljap, git nđờ jơt rbô nă làng bol tàm càr geh tŭ niam nàng geh broă lơh kơ̆ kơljap jŏ jòng sùm: “Tŭ sền ròt ală jơnau cih bơh VOV dê den bol hi gŏ gơ lơh ngoh rơngac ngan. Bol hi tam pà tàm ală mpồl bơh Mpồl duh broă, mpồl bơh ală sở, gah broă lơh dê mờ mpồl bơh ală tiah dê. Bol hi gŏ là, geh bal jơnau đơs bơh bơta sền sơ wì gah mblàng yal jơnau dê. Gơnoar atbồ bol hi neh geh jơnau dan, mơya tàm bơta sền sơ wì bơh gah mblàng yal jơnau dê den pơgồp bơnah lơh kơ̆ bơnàng jă, geh cơng tàng dipal, geh bơta di gùng di dà mờ bơta niam tŭ ală dơ̆ pơrjum bơh dà lơgar dê den pơgồp bơnah gơ hòi gơ jà rlau nàng dà lơgar in bơcri priă, tă bơsong bơta kòl yan Tây Nguyên in bè phan bơna”.

Bi Lý Văn Thanh, ơm tàm xã Dăk Sôr, kơnhoàl Krông Nô, càr Dăk Nông pà git, broă bơcri priă lơh phan bơna gùng lòt tŭ do kung gam ờ hềt uă, ală phan lơh gơs bơh suơn sre, plai chi lơh gơlik ờ gơtùi tac mờ lơh gơ rềng tus giă priă. Bi Thanh đơs là, dà lơgar pal sền gròi rlau tai tus bơcri priă ai phan bơna gùng lòt in, ngan là ală gùng rơndeh ntoat mhar nàng Tây Nguyên in bơtàu tơnguh: “Gùt lơgar gam ur ar lơh gùng rơndeh ntoat mhar, mơya ală càr tàm tiah Tây Nguyên kung gam pal kơp gơn. Làng bol Tây Nguyên geh ñchi, geh ù tiah mƀùr niam, geh kơphe, sầu riêng, ală chi tam geh cồng nha lơh sa uă; mơya làng bol Tây Nguyên ờ tơl bơta lơi, hơ̆ là ờ tơl gùng rơndeh ntoat mhar, ờ tơl ală gùng lòt rê ƀuơn ƀuài nàng kă bro. Sền ròt ală jơnau cih VOV dê cih bè gùng rơndeh ntoat mhar tàm Tây Nguyên añ gŏ di ngan. Đảng, dà lơgar pal sền gròi rlau tai tus tiah kal ke bè Tây nguyên den hơ̆ sồng gơtùi bơtàu tơnguh mhar mờ kơ̆ kơljap jŏ jòng sùm”.