Gĭt loh gơnoar broă kwơmàng ngan bơh kơnhoàl ù tiah Tây Nguyên dê, bơh nam 1993, kwang đơng lam bồ Anih Jơnau đơs Việt Nam (VOV) neh lơh nền lơh Anih lơh broă sùm tàm tiah Tây Nguyên tàm ù tiah ƀòn dờng Buôn Ma Thuột, tŭ hơ̆ là thị xã càr Dăk Lăk dê. Do là dùl jơnau lơh nền dipal ngan gơcèng bơta jŏ jòng, ờ mìng tơngŏ bơta rơcăng lài tàm broă rề ơnàng bơtàu tơnguh gơnoar broă bơh VOV dê mờ gam gơcèng bơta kwơ cíñ trị jrô ơnàng tàm tŭ kơnhoàl ù tiah Tây Nguyên gam tàm gùng lòt guh bal mờ dà lơgar. Ồng Lê Đình Đạo, Phó Kwang ătbồ dờng Anih Jơnau đơs Việt Nam lài do, là Kwang ătbồ Anih lơh broă sùm tiah Tây Nguyên bơh sơnrờp kah wơl bè do: Anih lơh broă sùm bơh VOV dê tàm tiah Tây Nguyên tơngai hơ̆ den bè bơta cau lơh broă mìng geh 3, 4 nă lơm kwang bàng bơh Hà Nội mŭt. Bol hi pal lùp mờ bơyai lơh rwah ală oh neh jơh bơsram Đại họk Tây Nguyên mờ lòt tus tàm ală ƀòn lơgar jòi ală oh geh bơta tơl pràn gơtùi lam lơh ală jơnau pờ tơlik mờ dà kòn cau. Ai bè phan bơna măy mok kung geh bơta dong kờl bơh ală anih lơh broă tàm ù tiah thị xã Buôn Ma Thuột tŭ hơ̆ dê, den bol hi neh apah dùl ròt hìu kâp puan, kơlik hìu lơh mờ găc 10 rơkàng hìu tìm mờ tăp phibro sơmang nàng lơh anih ơm mơkung là anih lơh broă tơn.

Y Khem Niê là cau lơh ƀăo, ồng là dùl tàm ală cau mblàng jơnau mờ sền jơnau mờ dà kòn cau Rơđê bơh sơnrờp bơh VOV Tây Nguyên dê. 30 nam neh lòt gan mơya jơnau kah wơl bè ală dơ̆ pờ tơlik jơnau đơs bơh sơnrờp bơh VOV Tây Nguyên dê kung gam sùm wơl bè ờs sơl. Ồng Y Khem Niê, đơs: Tài bơh tŭ hơ̆ ờ geh măy tíñ bè tŭ do nàng iăt wơl. Rê tàm hìu den pờ rơdio iăt wơl dờ he dê sền tàm rơdio. Pờ ai pô mê pô bàp mờ pơ ùr oh kòn he dê iăt bal. Kơno dờ he dê sền. Hơ̆ là chờ hờp ngan gơ ih.

30 nam do, ală cau lơh ƀăo VOV tàm Tây Nguyên mùl màl gơ gơs là ală cau ling lam lài tàm tiah lơh broă bồ tơngoh niam chài; lơh niam gơnoar broă kơnòl broă sră ƀăo kăc màng: là cau mblàng yal jơnau kờñ, gùng dà broă lơh bơh Đảng dê, jơnau pal jăt mờ adat boh lam bơh Dà lơgar dê. Yal tơngĭt jơnau mhar- dipal, di tŭ. Mơkung đơs lah, dră wơl geh bơta pràn gơtùi dòn jăt, ală jơnau đơs tìs ờ di, lah yă jơh ală jơnau jòi kai broă lơh tam gơl bơta ring lơngai, pơgồp bơnah kwơmàng tàm bơta bơtàu tơnguh Tây Nguyên dê. Gĭt nđờ jơ̆t khà jơng sră ƀăo Dà lơgar tàm ală nam do neh geh jàu ai ală cau lơh ƀăo bơh VOV Tây Nguyên dê in, là bơta sền swì, cih dờp dipal bơh Đảng mờ Dà lơgar dê gơ wèt mờ ală broă lơh ngan bơh mpồl kwang bàng cau lơh ƀăo bơh Anih lơh broă sùm tàm tiah Tây Nguyên dê.

Cih dờp bơta tă pơgồp bơh Anih lơh broă sùm tiah Tây Nguyên dê, Đảng mờ Dà lơgar neh geh uă phan ƀàn bè Gai lòng Lơh broă khà Pe, khà Bàr mờ khà Dùl tàm ală nam 2004, 2008 mờ 2015; Bồng bi tàm pơrlòng Cíñ phủ nam 2018 pà ai VOV Tây Nguyên in. Cau lơh ƀăo ồng Vũ Hải Định, Kwang ătbồ Anih Jơnau đơs Việt Nam lơh broă sùm tàm tiah Tây Nguyên, pà gĭt: Bol hi sền gròi broă tam gơl pa bơta niam tơngume ală jơnau đơs mờ dà kòn cau jăt bơta tơm bơh bơr uă, rềp mềl mờ làng bol kòn cau. Bol hi sền gròi tàm bàr pe jơnau cih bè jơnau cih sền gŏ ngan ngồn, jơnau lùp, kwơmàng là jơnau cih sền gŏ ngan ngồn mblàng sền, sền swì đơs jrô, geh bơta pơlam gùng mpồl bơtiàn uă. Cau lơh ƀăo bol hi ờ gŏ ngòt lòt tus tàm ală tiah kal ke; ngan là tàm tơngai kòp Kovid- 19 lơh bơtờp. Dơ̆ bàr là bol hi bơcri priă bơtàu tơnguh mpồl cau lơh broă lơh geh jơnau sồr bơh sră ƀăo pa dê. Bol hi sền gròi tàm măy mok sồ, tơnguh uă bơta niam bơh broă lơh ătbồ tus bơta chài jak lơh broă sră ƀăo bơh cau lơh ƀăo dê. Uă jơnau kơlôi sơnơng, jơnau kơlôi sơnơng jak chài, jơnau bơceh lơh tam gơl pa măy mok neh ngui tàm broă lơh ngan ngồn, lơh geh bơta niam.

Ală rơnàng kwang bàng, cau lơh broă tàm Anih lơh broă sùm Anih Jơnau đơs Việt Nam tàm tiah Tây Nguyên chờ hờp ngan tă pơgồp tàm gùng lòt bơtàu tơnguh bơh Tây Nguyên dê. Ồng Đỗ Tiến Sĩ, Kwang bàng Ƀan Câp hàñ Đảng Dà lơgar, Kwang ătbồ dờng Anih Jơnau đơs Việt Nam, pà gĭt: Anih lơh broă sùm tiah Tây Nguyên rơ̆p pơn jăt tai đòm jăt bơhiàn tam klăc bal, duh hồl, bơceh lơh; dipal mờ geh ngan, yal tơngĭt jơnau mhar lơh gơkờñ cau iăt mờ di tŭ. Mơya kung pờ tơlik geh ală broă lơh gùng dà lơh broă pa nàng bol he gơtùi bơto yal, lơh jăt kơnòl broă mblàng yal, ngan là mblàng yal bè bơta pal jăt bơh Đảng, Dà lơgar dê kung bè ală càr, ƀòn dờng tàm tiah Tây Nguyên gơ wèt mờ làng bol đơs bal mờ kwơmàng là làng bol kòn cau đơs is. Nàng bơh hơ̆ gŏ geh bơta sền gròi bơh Đảng, Dà lơgar dê, mơya kung gŏ geh bơta lơh ngan dùl nùs bal tam klăc bal bơh hìu bơnhă dờng ală jơi bơtiàn Việt Nam dê geh yal wơl dùl bă loh làng tàm tiah Tây Nguyên. Mờ tơngai tus, añ dòn là anih lơh broă sùm tàm tiah Tây Nguyên rơ̆p lơh jăt niam nùs nhơm tam klăc bal nàng sơlơ tàm cribơyai broă lơh ờs mờng nàng bol hi lơh gơs mpồl cau lơh ƀăo neh niam rao den sơlơ niam rlau jak rlau. Bol he geh mpồl cau lơh broă bal dipal nàng tơnguh uă rlau tai yal tơngĭt jơnau bơh ƀòn lơgar.   

Tơngkah kir sơnrai 30 nam lơh Anih lơh broă sùm tàm tiah Tây Nguyên là dùl tềl kah wơl kwơ màng. Bơh tềl kah niam ngan do, jơh ală kwang bàng, cau lơh ƀăo, cau sền swì jơnau, cau lơh broă măy mok mờ cau lơh broă tàm jơh gùt anih lơh broă rơ̆p pơn jăt tai cơnđòa lòt jăt ală rơnàng bèp rơnàng bi nàng tơmŭt bal să he tàm hìu ơm bal VOV ai jơnau đơs Việt Nam ngai sơlơ kơno tus ngài tai.