VOV4.K’ho- Di tơngkah kir sơnrai 97 nam Sră ƀăo Kăc màng Việt Nam, drim ngai 21/06, tàm ƀòn dờng Buôn Ma Thuột, Mpồl duh broă Khà jờng Sră ƀăo càr Dăk Lăk bơyai lơh jàu “Khà jờng Sră ƀăo càr Dăk Lăk dơ̆ 2 nam 2021”. Khà jờng Sră ƀăo càr Dăk Lăk nam do geh 155 jơnau cih bơh ală mpồl cau mờ cau dùl nă să dê gơwèt ală anih lơh broă sră ƀăo tàm càr mờ kâp dà lơgar lơh broă tàm ù tiah càr dê pơyua pơrlòng tàm ală gah ƀăo: pờ tơlik jơnau đơs, sơñio rùp, ƀăo in, ƀăo điện tử, mờ rùp sră ƀăo.

Mpồl cau pơrlòng lơh geh khà A Khà jờng Sră ƀăo Dăk Lăk

Mpồl duh broă Khà jờng Sră ƀăo càr Dăk Lăk neh rwah 52 jơnau cih niam ngan nàng jàu khà jờng, geh 4 khà A, 8 khà B, 18 khà C mờ ală khà pơn jờng. Ồng Nguyễn Văn Phú, Kwang ătbồ Mpồl Cau lơh ƀăo càr Dăk Lăk, đơs: ală jơnau cih pơyua nam do ndrờm geh bơta niam uă, bềng bơta đơs wơl, yal wơl song dơ pă broă cíñ trị, lơh sa mờ niam chài- mpồl bơtiàn tàm càr Dăk Lăk. Kwơmàng, nam do VOV Tây Nguyên là dùl tàm ală mpồl tus bal pơrlòng tàm uă bơta sră ƀăo mờ lơh geh 7 khà jờng, tàm hơ̆ geh 1 khà A, 1 khà B mờ 2 khà C.

Cau mblàng Lơ Mu K’Yến