Sa tềp tus cèng jăt bal gĭt nđờ bơta gơrơm nùs wă rò sơnam pa bal mờ bơta chờ hờp bơtòm tơrgùm măt bal, bal mờ ală bơta tam gơl tàm ƀòn lơgar mờ geh bal ală bơhiàn niam chài ờs mờng bơh yau geh prăp gàr mờ tàm tơrbŏ.

Sa tềp nam do tus gờñ den hìu bơnhă mò Y Phương, ơm tàm ƀòn Đăk Boi, thị trấn Đăk Glei, kơnhoàl Đăk Glei, càr Kon Tum kung ờ ru rlau mờ tơl nam. Pa tơn hào jơh bă ù bùm blàng di tŭ tăc ai hìu măy lơh gơlik phan in, jơh hìu bơnhă den wơl tai pơs wàs hìu đam. Hìu ơm kung neh jŏ, nam do khà priă lơh geh bơh broă tăc phan lơh geh bơh suơn sre, hìu bơnhă mò tă dùl ết priă jền sơng wơl hìu đam. Bàr pe phan ngui bè mơngàn, jơlŭ, kơ thàu jat tŭ tơngai pơh bồ den kung blơi wơl phan pa nàng ala. Sền mpồl kơnòm dềt geh ào mpha pa soh tàm ngai sa tềp ntoăt nhơl chờ hờp bơh tàm hìu tus mpồng hìu lơh nùs nhơm tàm hìu bơnhă mò Y Phương mho mang lồi nam sơlơ ram mhŭ, chờ hờp. Mò Y Phương chờ hờp pà gĭt, hìu bnhă neh rcang tơl phan ngui sa, phan hùc ngan là ală phan sa bơh yau bơh kòn cau Sơdàng dê nàng wă rò nam pa, wă rò sa tềp. Mò Y Phương đơs: Tơngai rcang wă rò nam pa kung là dơ̆ hìu bơnhă neh tơnhào jơh kòi, cèng kòi rê tàm hìu. Kòi tơn hào geh pơgap bơh 70 tus 80 bao. Wă rò nam pa den hìu bơnhă añ lơh poăc sur, lơh piang mbar buh. Tơnơ̆ tŭ rcang jơh ală phan sa bơh yau, pơdơng phan ơn duh khoai Yàng nàng Yàng ai lơngap lơngai jơh hìu bơnhă in nam pa geh pràn kơl dang să jan, lơh sa bơtàu tơnguh. Tơnơ̆ hơ̆, chờ hờp ngan rlau jơh là tŭ ơruh pơnu dròng cing jañ mồng, tam ya, đơs pơn đick, tơl nă cau tàm hìu bơnhă kung bal mờ gơ̆p ñô tơrnờm, sa ală phan sa bơh yau.

 Ală ngai mờr tus ngai sa tềp, hìu bơnhă mò Rơ Mah H’Peng mờ làng bol tàm ƀòn Thư Nhueng, xã Ia Phang, kơnhoàl Chư Pưh, càr Gia Lai chờ hờp ngan. Làng bol ring bal mờ gơ̆p pơs wàs sàng goh gùng lòt tàm ƀòn, pơs wàs jơh brêh brơm, klah jơh ntê chi klăp klê, khòm tơrgùm jơh sồ siă tàm jơh ală gùng dờng, dềt. Tơl hìu bơnhă tam tai chi che tềng kềng gah gùng ƀòn rềp hìu he dê, bơka niam wơl mpồng ƀòn, mờ pơs wàs rơndăp tăp sèng hìu đam nàng rơcăng wă rò sơnam pa. Jăt bi H’Peng yal, nam do, làng bol wă rò sơnam pa sa tềp tàm nùs nhơm chờ hờp ngan. Bi H’Peng, đơs: Jơh dùl hìu rơcăng pơs wàs hìu đam sàng goh, bơka niam wơl hìu đam, jơng gùng tung rềng kung geh pơs wàs sàng goh ngan, rơndăp tăp sèng ngan; pơs wàs gùng ƀòn, gùng drà sùm sàng goh nàng wă rò oh mi, gơ̆p bơyô, gơ̆p ƀòn lòt nting bơr sa tềp sơnam pa. Chờ hờp sơnam pa jơh ală cau chờ hờp chờ hờñ lơm, tìp măt bơyai lơh ñô sa, kơ̆p kờñ bal mờ gơ̆p sơnam pa pràn kơldang. Hơ̆ sồng tơm bơh bơr, yal bè dùl nam lơh sa, rài kis pah ngai; tam pà bal bơta mờng chài sền gàr sươn rơhàng, tam chi bè lơi nàng gơ in lơh geh cồng nha nàng rài kis làng bol sơlơ bơtàu tơnguh rlau tai, rài kis tam gơl mờ kơ̆ kơl jăp.

 Thôn Kon Chrah, xã Hà Ra, kơnhoàl Mang Yang, càr Gia Lai ge 180 hìu bơnhă mờ 970 nă cau. Wă rò sa tềp Qúy Mão nam do, làng bol tàm thôn kung lơh niam wơl hìu đam dờng ơnàng sàng goh mờ niam. Cau ùr lòt drà blơi ƀañ kèo. Kwang atbồ thôn ồng Hrun pà gĭt, lài do làng bol ƀòn lơgar kung ết ngan wă rò sa tềp, ờ gĭt sa tềp ờ. Ală nam pa do, geh bơta sền gròi bơh gơnoar atbồ tiah do dê mờ broă tă bơh kes priă pà làng bol tàm thôn in sur, iar nàng làng bol chờ hờp bal den tơl nă cau kờñ ngan tŭ tơngai sa tềp tus. Ồng Hrun đơs:Lài do sa tềp gơ lơh krơi ngan mờ làng bol, mơya tŭ do geh Đảng, Dà lơgar, gơnoar atbồ, xã sền gròi dong kờl priă jền, bơyai lam sa tềp ai ƀòn lơgar in. Dơ̆ 1 là làng bol chờ hờp ngan, lơh kòi geh tơn hào, kơphê den geh giă. Dơ̆ 2 tai là, kòp Kovid-19 kung neh geh gròi sền, den nam do làng bol tàm ƀòn chờ hờp ngan wă rò sa tềp, geh yăng tơrnờm, geh poăc iar, poăc sur, gơnoar atbồ xã nam lơi kung dong kờl bơyai lơh sa tềp ai làng bol in.

Ồng Chôn là làng bol ơm tàm ƀòn Tuơh Kơtu, xã G’Lar, kơnhoàl Đăk Đoa, càr Gia Lai den pà gĭt; Nam do òr uă hìu bơnhă tàm ƀòn neh lơh geh priă jền uă, pơnrơ bè: hìu bơnhă ồng Anŭ là kra ƀòn, hìu bơnhă ồng Nết, hìu bơnhă ồng Ƀyêu...kờp bal priă lơh geh bơh 150 tơlak tus 200 tơlak đong. Mìng is hìu bơnhă ồng Chôn pa do òr lơh geh rlau 100 tơlak đong bơh kơphê mờ tiêu...den tàng chờ hờp ngan tŭ wă rò sơnam pa, chờ sa tềp bơhiàn yau. Hìu bơnhă blơi tơl phan sa, dà hùc, ƀañ mư̆t, kèu...ai hìu bơnhă in. Ồng Chôn chờ hờp chờ hờñ ngan yal: Nam do, den kơphê, kòi, bùm blàng tàm tiah Bahnar xã G’Lar he lơh sa geh đau ngan, den tàng sa tềp tus làng bol kung chờ hờp sơl, chờ hờp chờ hờñ ngan, ờ gŏ di bè nam 2021 gơtìp kòp bơtờp, rài kis bềng bơta kơlôi rơcăng lơm. Rlau mờ hơ̆ tai, nam do, kơphê, kòi kung geh giă uă rlau sơl den tàng làng bol chờ hờp ngan, jơh tơl nă cau, tơl hìu ndrờm chờ hờp lơm wă rò sơnam pa 2023 mờ pin dờn rài kis rơ̆p kơ̆ kơl jăp rlau.

 Di dơ̆ wă rò nam pa, wă rò sa tềp tus, gơnoar atbồ ală càr tàm tiah Tây Nguyên lời ai bơta sền gròi, dong kờl sa tềp ai ală cau cíñ sác, hìu bơnhă kal ke nàng tơl hìu bơnhă in ndrờm sa tềp. Mìng is tàm dơ̆ sa tềp dà lơgar Qúy Mão do, bơh dơ̆ hòi jà, tă pơgồp bal bơh ală priă jền dong kờl, Ủy ƀan Mặt trận Dà lơgar Việt Nam càr Dăk Lăk neh dờp rlau 2 tơmàn 600 tơlak đong. Ồng Lê Xuân Sương, Phó Củ tịc thường trực Ủy ƀan Mặt trận Dà lơgar Việt Nam càr Dăk Lăk pà gĭt, bơh priă tă do, Mặt trận Dà lơgar ală kấp neh jàu pà phan tus tàm tê ală hìu bơnhă kal ke, dong làng bol in geh tơl ală bơta chờ hờp nam pa, wă rò sa tềp. Ồng Lê Xuân Sương đơs: Ală cau geh nùs nhơm niam, ală mpồl lơh sa kă bro, ală cau dong kờl is neh sùm lòt bal mờ Mặt trận Dà lơgar Việt Nam, neh bal mờ cau rƀah ờ mìng là tàm tơngai sa tềp Dà lơgar, mờ tàm ală tŭ kòp jê, trồ tiah lơh aniai, mìu càl rbŭt. Añ là cau jun pơndiang ală bơnah phan dong kờl hơ̆ tus mờ cau rƀah. Mìng is kấp càr rlau 4 rơbô bơnah phan pà. Ai tàm ù tiah 15 kơnhoàl, thị xã, ƀòn dờng tus tŭ do kung neh dong kờl mờr 20 rơbô bơnah phan pà.