Sơnđờm dồ ngai bơsram pa, cau pơrgu mờ 930 nă kơnòm bơsram Hìu bơsram kấp 1 Quang Trung, ƀòn dờng Kon Tum, càr Kon Tum lời 10 phuk sền ală rùp hin mờ hìu bơsram sền gĭt bơh tàm tiah gơtìp càl rơbŭt dờng, dà kŏ dà cò lơh aniai tàm ală càr, ƀòn dờng tiah đah Tô Dà lơgar dê: “Ngai do, ùr pơgru bal mờ ală kơnòm bơsram rơ̆p sền dùl gơl lơma lơyah wèt tus mờ làng bol tiah đah Tô dà lơgar gam gơtìp trồ tiah lơh aniai dà kŏ dà cò nàng sền gĭt ală bơta hoàc huơr, roh rui bơh làng bol tiah đah Tô dà lơgar dê”.

Oh Nguyễn Hữu Bảo Anh, kơnòm bơsram ơdŭ 4A, pà gĭt: “Tơnơ̆ tŭ sền ală gơl lơma kòn sơnđàc ngan ală làng bol tiah đah Tô dà lơgar bòl he dê neh pal kong mờ bơta jơgloh, noăt mrềt mờ pal sền gŏ ală cau pròc mhàm he dê gơtìp dà cò pơrdô. Kòn kơ̆p kờñ là mìu càl rơbŭt dơng do mhar ngan jơh nàng ai tiah đah Tô dà lơgar lơngăp lơngai wơl”.

Tềng đăp bơta roh rui, jê sồt muăt jrùm bơh làng bol tiah gơtìp mìu càl rơbŭt dờng, dà kŏ dà cò lơh aniai, Mpồl Atbồ Hìu bơsram kấp 1 Quang Trung lam lơh dơ̆ tă pơgồp bal mờ geh kơnòm bơsram kung bè mè bèp ală kơnòm bơsram dê jơh nùs ngan dong kờl tă pơgồp bal sơrlèt gan mờ bơta kơ̆p gơn. Lơh is dùl nơm sră pơyoa bơh sră cih he dê mờ rùp plai nùs mờ sèng khar “Pơyoa tiah đah Tô dà lơgar in” tàm hơ̆ geh 200 rơbô đông, oh Đỗ Hồng Anh, bơsram ơdŭ 3C, đơs bè do:“Priă do là priă bơh anih lơh broă bèp kòn dê ai kòn in nàng sa Tềp Trung thu mơya mờ kòn gŏ tơl nă cau tàm tiah đah Tô dà lơgar gơtìp dà kŏ dà cò là kal ke ngan den kòn neh lơh dùl nơm sră pơyoa do nàng pà ai tơl nă cau in. Kòn kơ̆p kờñ tiah đah Tô dà lơgar rơ̆p niam wơl mờ dà kŏ dà cò rơ̆p ờ gam jŏ jòng tai”.

Mìng tơnơ̆ dùl dơ̆ lam lơh, Hìu bơsram kấp 1 Quang Trung, ƀòn dờng Kon Tum neh tă pơgồp bal geh mờr 25 tơlak đong; 114 thùng bung mi, dà hùc; 20 thùng dà toh, bañ kèo; 8 nơm ào pơrđồng; pơgap 400 nơm ào mpha bal mờ uă phan ngui sa mờ sơnơm tơm ba. Ùr pơgru Đậu Thị Lan, Kwang atbồ Hìu bơsram kấp 1 Quang Trung, pà gĭt jơh ală priă jền bal mờ ală phan ngui sa mờ kơnòm bơsram mờ mè bèp kơnòm bơsram dê tă pơgồp bal rơ̆p geh hìu bơsram mhar ngan pơyoa tus làng bol tiah gơtìp mìu càl rơbŭt dờng, dà kŏ dà cò lơh aniai in. Kung jat ùr pơgru Đậu Thị Lan, bơta kwơ ngan là bơh broă lơh do, ală kơnòm bơsram geh bơto bơtê, geh uă tai nùs nhơm kờñ gơboh kòn bơnus, tam pà bal, dong kờl làng bol gơtìp rài kis kal ke, bòl glar.

Ùr pơgru Đậu Thị Lan, đơs: “Tềng đăp bơta mìu càl rơbŭt dờng, dà kŏ dà cò lơh aniai tàm tiah đah Tô dà lơgar mờ tŭ do làng bol gam pal kong, bơto bơtê ală kơnòm bơsram in bè nùs nhơm kờñ gơboh kòn bơnus, bơta tàm sơnđàc bal mờ tam pà bal là kwơ màng ngan. Ală kơnòm bơsram geh gĭt là he geh tam pà bal, geh tă pơgồp bal dà kơl hề dồ ết lơi hơ̆ nàng tam pà bal mờ làng bol tiah đah Tô dà lơgar in mờ ală phan pà geh kwơ ngan. Hìu bơsram ngoh rơngăc ngan tài bơh dờp geh bơta lòt bal bơh mè bèp kơnòm bơsram dê bơto bơtê ală kơnòm dềt in gĭt bè nùs nhơm kờñ gơboh kòn bơnus”.

Tàm ƀòn dờng Buôn Ma Thuột, càr Dăk Lăk neh bơyai lơh uă broă lơh geh kwơ tàm kàl Trung thu nam do, bè: ràng tơlik rùp hin Gùng lòt “Đèng gŭ sòl àng bơta kơ̆p kờñ” bơh 63 càr, ƀòn dờng; sơnđờm mut ngui, jàu pà “Tiah sền sră, tơm bơh bơr mờ pơrjum Mpồl”, tàm pơrlòng rơndăp phan tàm sơlào Trung thu, bơka đèng gŭ; wă rò đèng gŭ, tam ya đăng grài. Oh H Kim Anh Niê, bơsram ơdŭ 5C, Hìu bơsram kấp 1 Lê Lợi, tàm kơnhoàl Ea Kar, càr Dăk Lăk, đơs:“Ngai do, oh geh tus bal uă ngan broă lơh, oh gơ lơh hờn chờ mờ chờ hờp ngan tŭ geh tus bal dùl broă lơh dờng bè do. Mang do oh gam dờp geh uă ngan phan pà mờ priă bơsram, ưn ngài mơi wa neh sền gròi dong kờl ală bơyô geh rài kis kal ke in. Oh pơrgon rơ̆p bơsram sră jak ngan”.

Bi Nguyễn Phạm Duy Trang, Ƀí thư Mpồl duh broă Đoàn Dà lơgar, Củ tịc Mpồl duh broă Mpồl Dà lơgar pà gĭt, bal mờ càr Dăk Lăk, tàm kàl trung thu nam do, Đoàn Dà lơgar rơ̆p jàu 15 rơbô bơnah phan pà mờ 330 bơnah priă bơsram ai kơnòm dềt uă càr, ƀòn dờng dê in; jàu 4 nơm ƀlàng nhơl ai kơnòm dềt ală càr Gia Lai, Dăk Nông, Lạng Sơn mờ Cao Bằng in. Dong kờl priă mat mờ phan sa ai kơnòm dềt tàm 15 càr, ƀòn dờng gơtìp gơrềng tài bơh mìu càl rơbŭ dờng sồ 3 lơh aniai ( hơ̆ là mìu càl rơbŭt dờng pràn ngan Yagi). Kờp jơh ală broă lơh là mờr 13 tơmàn đong.

Bi Nguyễn Phạm Duy Trang, đơs: “Lơh jat jơnau hòi jà bơh Ƀan Ƀí thư Đoàn dà lơgar, ală kấp ƀộ Đoàn, mpồl, is ồn là ală kơnòm dềt jơh gùt lơgar neh sơm bat tê bal lơh ală broă lơh nàng kờñ dong kờl, tam pà bal mờ ală kơnòm dềt tàm ală càr tiah đah Tô dà lơgar dê in. Ală phan pà dềt ờ mìng cèng tus bơta hờn chờ, dong kờl tai bơta pràn ai ală kơnòm dềt ờ hoan bơtoah lơm ờ mờ gam lơh geh tai tàm nùs nhơm ală kơnòm dềt dê nùs nhơm kờñ gơboh, nùs nhơm kờñ gơboh kòn bơnus, bơta tam pà bal mờ mpồl bơtiàn”.

Tàm mang ngai chờ, tàm nùs nhơm hơn chờ, hô hơng, ală kơnòm dềt geh sền dơ̆ bơyai lơh tam ya đăng grài mờ ală dơ̆ đơs crih tam ya bè tơngume Sa tềp Trung thu, tàm tơrbŏ bal tàm internet mờ kơnòm dềt ală càr:  Hải Phòng, Lâm Đồng, Bình Dương, Tiền Giang mờ ƀòn dờng Hồ Chí Minh. Mpồl bơyai lơh neh jàu pà  1 rơbô 700 bơnah phan pà, geh: priă bơsram, rơndeh coh mờ phan pà ƀañ trung thu ai ală kơnòm dềt geh rài kis kal ke tàm ù tiah càr Dăk Lăk in.

Đơs tàm broă lơh, Phó Thủ tướng Duh broă sùm Cíñ phủ ồng Nguyễn Hòa Bình jờng rơ ală sau kơnòm dềt tài ală cồng nha jak ngan tàm broă bơsram sră, bơsram tàp, pơnđơl pràn lơh ngan tàm rài kis. Kơ̆p kờñ ală sau pơn jat tai đòm jat bơhiàn dờng màng bơh kơnòm pa tàu, kơnòm dềt lơgar Việt Nam dê. Ồng Nguyễn Hòa Bình đơs:“Wa kơ̆p kờñ tơl nă sau ndrờm geh chờ hờp Trung thu ram mhŭ bal mờ ală cau kờñ gơboh bơh he dê, pơn jat tai lơh jat niam 5 bơta Wa Hồ dê bơto, kờñ gơboh ồng mo, mè bèp, ki ngàm cau pơgru, dòn bơr gơwèt mờ cau dờng, tam klăc bal, dong kờl ală bơyô geh rài kis kal ke, is ồn ală bơyô gam kong jơnau gơ lời wơl kơn jơ̆ kơn jŭt ngan bơh mìu càl rơbŭt dờng, dà kŏ dà cò lơh aniai dê, nàng bal mờ gơ̆p lòt bơsram tàm hìu bơsram, ơdŭ bơsram; tơryang tơryồng bơsram sră mờ bơsram tàp nùs nhơm niam nàng tơnơ̆ do gơ gơs cau tờm bơt bơtàu dà lơgar he dê ngai sơlơ pas niam mờ niam jak".