VOV4.K’ho- Mho ngai 12/09, Tỉñ ủy Gia Lai bơyai lơh Pơrjum lam lơh jăt kơrnoăt bơh Ƀan Ƀí thư dê bè broă lơh kwang bàng, yal kơrnoăt bơh Ƀan Ƀí thư dê bè broă ntrờn, pồ ồng Trương Hải Long, lài do là kwang bàng tàm Mpồl đơng lam Đảng, Thứ trưởng Ƀộ Nội vụ mŭt tàm Mpồl lơh jăt, Ƀan Mpồl duh broă sùm Tỉñ ủy Gia Lai, ăt gơnoar broă Phó Ƀí thư Tỉñ ủy Gia Lai tơngai lơh broă bơh nam 2021- 2026. Tàm pơrjum, geh bơta jàu kơnòl bơh Ƀan Ƀí thư mờ Mpồl rơndăp broă dà lơgar dê, ồng Hoàng Đăng Quang, Kwang bàng Đảng Dà lơgar, Phó Kwang ătbồ Mpồl Rơndăp broă dà lơgar yal kơrnoăt.

Ồng Hoàng Đăng Quang, Phó Kwang ătbồ Mpồl Rơndăp broă dà lơgar yal kơrnoăt bơh Ƀan Ƀí thư dê ai ồng Trương Hải Long in

Ồng Trương Hải Long deh ngai 18/04/1976, ƀòn tờm kơnhoàl Yên Phong, càr Bắc Ninh, mŭt Đảng nam 2004, jơh bơsram Đại họk Khoa họk Xã hội mờ Ñân văn, Đại họk Dà đơs lơgar ndai (Đại họk Dà lơgar Hà Nội); geh sră cơng tàng jơh bơsram thạk sĩ Adat boh lam mờ cribơyai tàm sră pơ àr cíñ trị kâp dờng. Lài mờ tŭ geh pồ lơh Phó Ƀí thư Tỉñ ủy Gia Lai, ồng Long neh lơh uă gơnoar broă bè Phó Kwang ătbồ Vụ, Kwang ătbồ Vụ Kông cưk- Viên cưk, Ƀộ Nội vụ; Kwang bàng tàm Mpồl đơng lam Đảng, Thứ trưởng Ƀộ Nội vụ bơh nhai 6 nam 2021 tus tŭ do mờ geh rơndăp lơh gơnoar broă Ƀộ trưởng Ƀộ Nội vụ tơngai bơh nam 2021- 2026.

Cau mblàng Lơ Mu K’Yến