Tơngai do, bơta tơrlah ù, lŭ tàm Tây Nguyên lơh gơtìp uă bơta hoàc huơr bè màng kis kòn bơnus bal mờ phan bơna làng bol dê. Bơta tờm lơh gơtìp uă dơ̆ tơrlah ù tàm ală càr tơngai do, tàm hơ̆ uă ngan là tàm Tây Nguyên neh geh Thứ trưởng Ƀộ Tài nguyên mờ Môi trường ồng Lê Công Thành mblàng tàm dơ̆ pơrjum ƀăo yal Cíñ phủ bè ờs nhai 7. Đơs tus ờ uă bơta tờm lơh gơtìp tơrlah ù, Thứ trưởng Ƀộ Tài nguyên mờ Môi trường ồng Lê Công Thành mblàng là, mờ chàr bơnơm geh is, bal mờ bơta tam gơl bơh ù brê gơs ù tam phan ha là cò pơn ring ù nàng lơh hìu, lơh gùng lòt... bơta geh bơh ù neh tam gơl, lơh gơtìp di gơlan tơrlah tŭ geh mìu dờng. bơta tơngŏ bơh tơrlah ù là mìu uă ngai, mìu dờng; gơlik geh rơdàng hìu, chàr bơnơm, tăp ù gơguh, tăp ù gơrrơm...

Tŭ gŏ ală bơta do, Làng bol pal sền iăt jơnau yal lài dà cò, tơrlah ù, yal gơnoar atbồ bal mờ ală cau gùt dar in. ală mpồl lơh broă tàm ală tiah pal sền gròi mờ bơyai lơh ntrờn di lah di gơlan gơtìp tơrlah uă, pal sền gàr màng kis lài jơh. Thứ trưởng Ƀộ Tài nguyên mờ Môi trường ồng Lê Công Thành yal lài, kàl mìu càl dờng rơ̆p geh, kờp dŭ rềs àr bơh trồ tiah gam gơtìp kal ke, di gơlan lơh gơtìp ală hoàc huơr mờ he ờ git lài. Thủ tướng Cíñ phủ kung neh geh jơnau đơng lam nền nòn ală càr tàm Tây Nguyên pơn jăt tai sền gròi, jăt sền, tơmù bơta kal ke.