Tàm 2 ngai bơh ngai 24 tus ngai 25 nhai 08, Anih tờm lơh broă mờ lơgar ndai, Ƀộ Lao động- Thương ƀiñ mờ Xã hội pơgồp bal mờ Sở Lao động- Thương ƀiñ mờ Xã hội càr Kon Tum bơyai lơh dơ̆ yal tơngĭt broă lơh tàm 2 kơnhoàl kal ke dờp geh broă lơh dong kờl 30a bơh Cíñ phủ dê là Tu Mơ Rông mờ Kon Plông. 

Dơ̆ yal tơngĭt broă lơh neh pơlam gùng dà broă lơh ai rlau 600 nă cau lơh broă là jơi bơtiàn dùl ết nă cau Sơdàng tàm 2 kơnhoàl do in. Tàm 2 dơ̆ yal tơngĭt broă lơh, geh 42 mpồl lơh sa kă bro, mpồl lơh broă dan cih mat geh jơnau kờñ sac rơwah cau lơh broă mờ rlau 2 rơbô 200 broă lơh tàm càr, bơcdìh càr mờ lòt lơh broă geh tơngai pơr gon tàm lơgar ndai. Ală cau lơh broă tàm 2 kơnhoàl Tu Mơ Rông mờ Kon Plông càr Kon Tum dê tơnơ̆ tŭ jòi gĭt, geh bơto pơlam tàm dơ̆ yal tơngĭt broă lơh rơ̆p tus tơn tàm Anih tờm yal tơngĭt broă lơh càr Kon Tum dê nàng tàm tơrbŏ bal mờ mpồl lơh sa kă bro mờ lơh sră nggal. Do là dơ̆ sơn rờp, Anih tờm yal tơngĭt broă lơh lơgar ndai bơyai lơh dơ̆ yal tơngĭt broă lơh tàm ù tiah càr Kon Tum dê.