Dơ̆ tơngkah kir sơnrai, ai ling lòt pơdar, ai cau lòt pơdar sơnđờm niam ngan mờ 21 nai phàu kơnong cuh tàm bơta pờ gùng đơs crih dà lơgar Kộng hoà Xã hội Củ nghĩa Việt Nam. Pơn jăt hơ̆ là bơnah lơh bơh mpồl rơndeh par duk cèng bồng bi Đảng, bồng bi Dà lơgar par gan anih bơyai lơh tơngkah kir sơnrai. Tơnơ̆ hơ̆ là ală jơnau cih đơs, jơnau đơs bơh Thủ tướng Cíñ phủ ồng Phạm Minh Chính dê, ala măt cau ling Điện Biên, ala măt rơnàng kơnòm să dê; Broă lơh jàu Gai lòng Lơngăp lơngai is khà Dùl ai Đảng ƀộ, gơnoar ătbồ mờ làng bol ală jơi bơtiàn càr Điện Biên in mờ dŭt ndơl là dơ̆ ai ling lòt pơdar, ai cau lòt pơdar yŭ rơyùm ngan.

Tơrgùm jơh mpồl cau tus bal ai ling lòt pơdar, ai cau lòt pơdar là rlau 12 rbô nă. Mpồl rơndeh par duk pơñiờ să ngan par gan ală broă bơ̆t bơtàu, tiah tềl lời wơl kah yau bè Dòr A1, Ƀlàng tơ̆p ƀồc cau ling chơ̆r màng Dòr A1, Rùp mòn kah kơlôi Tam lơh pha lin Điện Biên Phủ, Anih prăp gàr phan kwơ yau Điện Biên Phủ..., tơl mpồl ai ling lòt pơdar, ai cau lòt pơdar khin cha jak chài mŭt tàm anih bơyai lơh tơngkah kir sơnrai pơn jăt tai mờ jơnau yal nền cê ngan tơngŏ nùs nhơm khin cha jak chài, bơta pràn dờng ngan bơh mpồl tam klăc dờng jơh gùt jơi bơtiàn dê bơh bơta đơng lam bơh Đảng Kộng sản Việt Nam mờ Củ tịc Hồ Chí Minh dê, lơh gơs Tam lơh pha lin Điện Biên Phủ “pơnrơ làm gùt dunia, lơh rơnggô làm gùt plai ù”.