Rềp làng bol, ơm mờ làng bol, bơsong mhar sră pơ àr ai làng bol in là bơta sền gĭt bơh uă ngan làng bol dê tŭ tus ală anih tờm sră pơ àr gơnoar atbồ Dà lơgar bơh ală sàh, sơnah ƀòn pa. Nàng broă bơyai lơh mut lơh broă gơnoar atbồ 2 kấp geh bơyai lơh geh cồng nha, Duh broă sùm Tỉñ ủy càr Lâm Đồng neh tam pà broă lơh lòt sền tàm uă sàh, sơnah ƀòn.

Tus sền tàm sơnah ƀòn Xuân Trường, ồng Hồ Văn Mười, Củ tịc Anih duh broă Làng bol càr Lâm Đồng neh lùp còp, pơndờm pơnđiang làng bol tus lơh sră pơ àr tàm mpồl lơh broă Anih tờm sră pơ àr gơnoar atbồ Dà lơgar. Củ tịc Anih duh broă Làng bol càr Lâm Đồng kung nting tơngkah mpồl lơh broă, đơng lam bồ, cau lơh broă sơnah ƀòn Xuân Trường pal pơn đơl pràn lơh ngan, jơh nùs lơh ngan, tam klăc bal is, pờ tê tàm klăc bal, “tàm sơm bat tê bal kơ̆ ngan” nàng lơh jat jơnau kờñ drơng broă làng bol, bơtàu tơnguh ƀòn lơgar mờ pơgồp bơnah bơtàu tơnguh Dà lơgar.