Kờp tus nggùl nhai 2 nam 2025, neh geh 15 nă kwang bàng gơwèt Mpồl Lơh kơnòl broă sùm Tỉñ ủy càr Kon Tum atbồ dan rlô lơh broă lài mờ sơnam ai rê rlô. Tàm ală cau hơ̆ geh ồng Nguyễn Trung Hải, Kwang bàng Mpồl Lơh kơnòl broă sùm Tỉñ ủy càr, Kwang atbồ Mpồl Mblàng yal bơto bơtê Tỉñ ủy càr Kon Tum. 14 nă kwang bàng gam wơl dan rlô lơh broă lài mờ sơnam ai rê rlô là Kwang bàng Tỉñ ủy, Kwang Lam bồ mờ Phó Kwang Lam bồ bàr pe sờh, gah broă.

Mò Ngô Thị Hoàng Anh, Phó Kwang lam bồ Mpồl Rơndăp broă Tỉñ ủy càr Kon Tum pà gĭt, ală kwang bàng dan rlô lơh broă lài mờ sơnam ai rê rlô lơh jat nùs nhơm Jơnau lơh nền tàm pơrjum sồ 18 bơh Mpồl Duh broă Đảng Dà lơgar, lơh geh bơta ƀuơn ai broă lơh jat gùng dà broă lơh bơh Dà lơgar dê tam gơl pa, rơndăp tăp sèng mpồl kwang bàng bơh ală anih lơh broă cíñ trị dê, mơkung lơh geh tŭ tơngai niam ai kwang bàng kơnòm să in geh bơta pràn jak pơn jat tai tă pơgồp dà kơl hề.