Do rơ̆p là tềl lời wơl kah yau kwơmàng tàm ală tŭ lơh broă lơh tam gơl pa wơl rài lơh sră pơ àr gơnoar ătbồ dê. Ngai òr 30/06, jơh gùt lơgar dồ ròt lơh Dơ̆ yal ală jơnau lơh nền tàm pơrjum, jơnau lơh nền bơh Dà lơgar mờ ƀòn lơgar dê bè tơmŭt bal mpồl lơh broă sră pơ àr gơnoar ătbồ kâp càr, kâp sàh, tơnggơs mpồl đảng, lơh nền rwah kâp ủy, Mpồl duh broă Làng bol, Anih duh broă Làng bol, Anih duh broă Mặt trận dà lơgar càr, ƀòn dờng, sàh, sơnah ƀòn, tiah is ồn, nàng ngai do 01/07 lơh broă ngan ngồn broă lơh mpồl lơh broă gơnoar ătbồ ƀòn lơgar 2 kâp.

Să tờm tơn lòt sền broă lơh gơnoar ătbồ ƀòn lơgar bàr kâp tàm ƀòn dờng Hồ Chí Minh, Tổng Ƀí thư ồng Tô Lâm đơs sùm, jơnau kờñ dờng ngan rlau jơh bơh mpồl lơh broă pa dê là tài bơta bơtàu tơngguh mhar, kơ̆ kơl jăp bơh dà lơgar dê bơh ƀòn dờng dê mờ sền gròi trăng gàr ai rài kis làng bol dê in. Bơ̆t bơtàu mpồl lơh broă gơnoar ătbồ tơrmù dipal, lơh broă gơtùi, geh cồng nha, tam gơl bơh broă ătbồ ờ rơcăng tus ătbồ broă ngăc ngar drơng làng bol in, gơnoar ătbồ tài làng bol, drơng làng bol bơceh lơh ai bơta bơtàu tơngguh in mờ tơl pràn jak lơh broă nàng gơtùi lam lơh geh cồng nha ală jơnau sồr bơh Đảng dê tàm ngan ngồn rài kis tài bơta bơtàu tơngguh bal bơh dà lơgar dê.