Ồng Nguyễn Xuân Thắng, Kwang Lam bồ Anih bơsram kơlôi sơnơng Cíñ trị Dà lơgar Hồ Chí Minh đơs nền: Đảng pal pơn jat tai tam gơl pa pràn kơl dang bè bồ tơngoh kơlôi sơnơng bơtàu tơnguh tam gơl pràn ngan ngồn tàm ală lơh nền gùng dà broă lơh kwơ màng, tàm lơh jat bơceh lơh sùm, nàng bơtàu tơnguh bơta pràn jak, bồ tơngoh, khin cha đơng lam mờ rơndăp broă lơh kwơ màng jak chài tàm broă rơndăp gùng dà broă lơh kwơ màng bơh Đảng dê.

Kàl prang Nam pa nam 1930, Đảng Kộng sản Việt Nam geh tơnggơs, lơh tềl broă lơh kwơ màng tàm rài kah yau kăc màng Việt Nam. Tàm pơrjum tơnggơs Đảng (geh bơyai lơh bơh ngai 6-1 tus ngai 7-2-1930), Đảng kộng sản Việt Nam neh sền gĭt gùng lòt bơtàu tơnguh bơh kăc màng Việt Nam dê, là: "Lơh phan kăc màng phan bơna is gơnoar làng bol mờ cau tờm ù tiah nàng lòt tus mpồl bơtiàn kộng sản”,lơh jat jơnau kờñ: “Lơngăp lơngai is jơi bơtiàn mờ rài ndrờm bal mpồl bơtiàn”. Mờ gùng dà broă lơh kăc màng di ngan, jak chài mờ bơceh lơh, bơh tŭ tơnggơs tus tŭ do, Đảng Kộng sản Việt Nam sùm kơ̆ dơn jơnau kờñ lơngăp lơngai is jơi bơtiàn mờ rài ndrờm bal mpồl bơtiàn, đơng lam làng bol Việt Nam lơh geh ală cồng nha dờng ngan, lơh jăt ngan ngồn jơnau kờñ bơt bơtàu Dà lơgar Việt Nam làng bol pas, dà lơgar pràn, làng bol lơh tờm, ring bal, jak chài. Phó Pơgru dờng, Tiến sĩ ồng Bùi Đình Phong, Anih bơsram Kơlôi sơnơng Cíñ trị Dà lơgar Hồ Chí Minh đơs nền: "95 nam bơh bơta đơng lam bơh Đảng dê bol he geh cồng nha dờng bè tŭ do den hơ̆ là geh 3 bơta kwơ màng ngan. Dơ̆ 1 pal đơs nền bơta đơng lam di ngan bơh Đảng dê là bơta lam lài lơh nền lơh geh cồng nha bơh kăc mạng dê. Bơta dơ̆ 2 kung kwơ mang ngan hơ̆ là bol he ăt kơ̆ bồng bi lơngăp lơngai is jơi bơtiàn mờ Củ nghĩa xã hội. Do là dùl tam gơl pràn bơceh lơh bè gah jơnau tàm sră pơ àr bơh Wa Hồ tus Đảng mờ kơnờm bơh hơ̆ mờ bol geh jai pha. Bơta dơ̆ 3 hơ̆ là bơta pràn bơh làng bol dê là nggu rơyah tờm bơh jai pha kăc màng dê”.

 Ală cồng nha lơh geh bơh 95 nam neh lơh kơ̆ kơl jăp bơnàng jă, lơh geh bơta gơn kơnờm pràn kơl dang nàng Đảng pơn jat tai đơng lam Dà lơgar cơn đoà kơ̆ mut tàm rài pa- rài brồ să bơh jơi bơtiàn dê. Phó Pơgru dờng- Tiến sĩ Nguyễn Viết Thảo, Kwang bàng Mpồl duh broă Jơnau tàm sră pơ àr Dà lơgar đơs nền: "Broă kờñ lơh geh tàm rài brồ să là pal bơt bơtàu dùl Dà lơgar Việt Nam Xã hội củ nghĩa dờng pràn, pas pràn, niam jak, tơƀă pơnì bal mờ ală lơgar dờng pràn kơnhoàl ù tiah bè Wa Hồ neh đơs bơh nam 1945, hơ̆ là broă kờñ lơh geh. 2 jau kờñ loh làng ngan, tus nam 2030 pal gơ gơs Dà lơgar gam bơtàu tơnguh, geh broă lơh sa mờ măi mok tàm tơngai pa, priă lơh geh kờp bal uă, nàng tus nam 2045 gơ gơs Dà lơgar rài ndrờm bal mpồl bơtiàn bơtàu tơnguh, priă lơh geh uă. Añ dan đơs ngan là pal là Dà lơgar rài ndrờm bal mpồl bơtiàn, ring bal, làng bol lơh tờm, niam jak, pas gơs mờ chờ hờp”.

Tàm pơrjum bơyai, Kwang lam bồ Anih bơsram kơlôi sơnơng Cíñ trị Dà lơgar Hồ Chí Minh ồng Nguyễn Xuân Thắng đơs là, nàng lơh jat tus geh ală jơnau kờñ kwơ màng tus nam 2030, broă rơndăp lơh tus nam 2045, Đảng pal pơn jat tai tam gơl pa pràn kơl dang bồ tơngoh kơlôi sơnơng bơtàu tơnguh, geh ală broă lơh tam gơl pràn tàm lơh nền gùng dà broă lơh kwơ màng, lơh jat nùs nhơm bơceh lơh, sùm yờ tơnguh uă bơta pràn jak bồ tơngoh, khin cha cíñ trị mờ rơndăp broă kwơ màng jak chài tàm rơndăp gùng dà broă lơh dê: “Đảng pal pơn jat tai tam gơl pa pràn ngan bè bồ tơngoh kơlôi sơnơng bơtàu tơnguh, hơ̆ là pal geh tam gơl pràn ngan ngồn tàm ală lơh nền gùng dà broă lơh kwơ màng, tàm lơh jat niam bơceh lơh sùm, nàng tơnguh uă bơta pràn jak, bồ tơngoh kơlôi sơnơng, khin cha đơng lam mờ rơndăp broă lơh jak chài tàm rơndăp gùng dà broă lơh kwơ màng bơh Đảng dê. Pal bơsram jrô uă ngan nùs nhơm kwơ màng lơh sùm bơh Đảng dê là “Bơtàu tơnguh mhar mờ kơ̆ kơl jăp Dà lơgar”, tàm hơ̆ bơtàu tơnguh lơh sa- mpồl bơtiàn mờ sền gàr tiah ơm kis là tờm, bơt bơtàu Đảng pơn jat tai là kwơ màng ngan, kwang bàng “tờm bơh tờm dê”; bơtàu tơnguh niam chài mờ kòn bơnus là bơnàng jă. Do là priă jền phan bơna, pràn jak tàm dơlam is, priă jền mờ bơta gơn kơnờm bơh bơta bơtàu tơnguh dê”.

Đơs tàm pơrjum cribơyai, Lam bồ Mpồl Mblàng yal bơto bơtê Dà lơgar ồng Nguyễn Trọng Nghĩa đơs sùm bơta pơn yờ să bè bơhiàn 95 nam Đảng đơng lam kăc màng Việt Nam, mờ kơnòl broă tờm pơn jat tai pơn đơl pràn lơh ngan bơt bơtàu, bơt bơtàu ală cồng nha lơh geh, bơta kwơ bơh Đảng dê. Ồng Nguyễn Trọng Nghĩa pin dờn pơrjum cribơyai rơ̆p pơgồp jơh nùs ai broă lơh kơlôi sơnơng, mblàng yal, bơto bơtê nùs nhơm àng sơr dah bơh Củ tịc Hồ Chí Minh dê, ală kwang đơng lam bồ kăc màng lài do, rơnàng đảng viên jơh nùs dòn song, khin cha jak chài... ai tŭ do mờ tơnơ̆ do in. Sơlơ tơnguh tai bơt bơtàu, bơtàu tơnguh rlau tai bơta pin dờn bơh làng bol dê gơwèt mờ Đảng, lơh geh bơta ring bal uă bè bồ tơngoh, nùs nhơm mờ broă lơh tàm jơh gùt Đảng, jơh gùt Làng bol, jơh gùt ling klàng, tài dùl Việt Nam “Ring lơngai, lơngăp lơngai is, làng bol lơh tờm, pas pràn, niam jak, kis chờ hờp, cơnđòa kơ̆ lòt guh Rài ndrờm bal mpồl bơtiàn”.