Là càr tiah bơnơm, tiah nhàr lơgar đah Tô măt tơngai Mŭt dê, Sơn La geh mờr 275 kơi sồ gùng nhàr lơgar rềp mờ lơgar Lào; khà kờp làng bol rơlao1 tơlăk 400 rơbô nă mờ 12 jơi bơtiàn. Jờng rơ 6 cồng nha mờ càr neh lơh geh tàm tơngai do, pơnrơ ngan là lơh sa mpồl bơtiàn kơl jăp, tiah kis geh sền gàr, lơh geh tai broă lơh sa suơn sre pơn jăt tai lòt di gùng dà broă lơh, ală gah broă niam chài, mpồl bơtiàn mờ rài kis broă lơh broă sa pơn jăt tai geh drơng gàr.

Ồng Tô Lâm, Tổng Bí thư, Chủ tịch lơgar đơs nền, ală cồng nha do ai tơngŏ nùs nhơm tam klăc bal, rơcang lài, lơh pràn, geh kơnòl bơh Đảng ƀộ, gơnoar atbồ, mpồl ling, mpồl bơtiàn mpồl lơh sa kă bro bal mờ làng bol ală jơi bơtiàn càr Sơn La dê. Ồng sồr càr Sơn La tơrgùm đơng lam, sồr lơh 8 mpồl kơnòl broă tờm, tàm hơ̆ pal rơcang lài, ai git loh broă bơtàu tơnguh bal mờ tiah ơm bơh càr Sơn La dê tàm tiah đah Tô măt tơngai Mŭt. Đơs loh nùs nhơm, pal bơtàu tơnguh kòn bơnus, bơto bơtê, kơl jăp ƀòn ơm kis mờ tơrmù rơƀah kơl jăp lơh tờm, Tổng Bí thư, Chủ tịc lơgar sồr tơnkah, càr tềng đăp măt pal rơcang niam ngan nam bơsram 2026-2027, lơh niam broă kham bơta pràn kơl dang să jan jăt tơngai ờ sa priă ai làng bol in 1 dơ̆ tàm 1 nam.